Tai New Year 2017 In Bankkok ThaiPBS

Sourcehttp://www.youtube.com/watch?v=8zMScA4pNkg

2017 Shan New Year Chiang Mai

sourcehttp://www.youtube.com/watch?v=J6DOgtDzhV4

သိုၵ်းမၢၼ်ႈၶတ်းၸႂ်တတ်းၶၢတ်ႇ ၼႂ်းၵႄႈၵၢင်ဝႃႉတင်းတႆး

Thursday, 14 March 2013 17:06 ပၢင်လူင်

ဢၼ်တပ်ႉသိုၵ်းမၢၼ်ႈသူင်ႇႁႅင်းသိုၵ်းတိုၵ်းယိုဝ်း တပ်ႉပၢင်သဝ်းလွႆလၢၼ်း SSA ၼႂ်းၸႄႈဝဵင်းတၢင်ႉယၢၼ်း၊ ပိူဝ်ႈတႃႇတတ်းၶၢတ်ႇ ၵၢၼ်ၵပ်းသိုပ်ႇတိတ်းတေႃႇၼႂ်းၵႄႈ တပ်ႉသိုၵ်းၸိုင်ႈတႆးလႄႈ ၸုမ်းဝႃႉ UWSA ။

ၸဝ်ႈသိုၵ်းလူင်ၸၢႆးထူး

ၸဝ်ႈသိုၵ်းလူင်ၸၢႆးထူး တွပ်ႇလၢတ်ႈၽူႈသိုဝ်ႇၶၢဝ်ႇတွင်ႈထၢမ် မိူဝ်ႈဝၼ်းတီႈ 12/03/13  ၽွင်းၵႂႃႇၶဝ်ႈႁူမ်ႈပၢင်ဢုပ်ႇဢူဝ်း လွင်ႈငမ်းယဵၼ် ဝူင်ႈၵၢင်ၶၢင်တင်းမၢၼ်ႈတီႈမိူင်းမၢဝ်း (မိူင်းၶႄႇ)ဝႃႈ- ဢၼ်သိုၵ်းမၢၼ်ႈၶဝ် ၸႂ်ႉႁဝ်းထွႆထွၼ်တပ်ႉပၢင်သဝ်းတီႈ လွႆလၢၼ်းၼႆႉ ၶဝ်ၼႄၼႃႈတိူဝ်ႈဝႃႈ ပိူဝ်ႈတႃႇၽဵဝ်ႈမူၺ်ႉသူၼ်ယႃႈ၊ ဢၢင်ႈဝႃႈ DEA တေဢဝ်ႁိူဝ်းဝိၼ်မႃးလူင်းၼႆႉသေ ၸႂ်ႉႁဝ်းၶႃႈထွၼ်သိုၵ်းပၼ်။ ၵမ်းၼႆႉႁဝ်းဢမ်ႇထွႆပၼ်လႆႈ၊ ၵွပ်ႈဝႃႈ ႁဝ်းထွၼ်ပၼ်မႃးၼမ်ယဝ်ႉ။

သိုပ်ႇလၢတ်ႈဝႃႈ- ႁဝ်းၶႃႈဝႃႈယႃႇပေၶိုၼ်ႈမႃး၊ ႁဝ်းသိုပ်ႇပၵ်းယူႇဝႆႉယူႇၼႆၵေႃႈ သိုၵ်းမၢၼ်ႈၵၢၼ်းၶိုၼ်ႈမႃးတိၵ်းတိၵ်းလႄႈ လႆႈယိုဝ်းၵၼ်။ သၼ်လွႆလၢၼ်းၼႆႉ ၵွပ်ႈၸမ်ၼမ်ႉၶူင်း၊ ပဵၼ်လႅၼ်ၶႅၼ်ႈဝႃႉတင်းႁဝ်းလႄႈ ယိူင်းဢၢၼ်းသိုၵ်းမၢၼ်ႈတႄႉ တိုၼ်းၶႂ်ႈတတ်းၶၢတ်ႇပႅတ်ႈသဵၼ်ႈတၢင်းတိတ်းတေႃႇၵပ်းသိုပ်ႇၼႂ်းၵႄႈဝႃႉတင်းႁဝ်း - ဝႃႈၼႆ။

ၽူႈပၵ်းတႃတူၺ်းၵၢၼ်မိူင်းၵၢၼ်သိုၵ်းမိူင်းမၢၼ်ႈ ဢၼ်ယူႇတီႈလႅၼ်လိၼ်မၢၼ်ႈ-ၶႄႇ ဢူးဢွင်ႇၵျေႃႇၸေႃး လၢတ်ႈဝႃႈ- တီႈတပ်ႉပၢင်သဝ်းလွႆလၢၼ်းၶွင် SSPP/SSA ၼႆႉ ပဵၼ်တီႈၶိုၵ်ႉၶမ်ႇလမ်ႇလွင်ႈတွၼ်ႈတႃႇ ဝႃႉတင်း SSPP/SSA ။ သင်ဝႃႈ တပ်ႉသိုၵ်းၸိုင်ႈတႆး ထွၼ်ပၼ်တပ်ႉပၢင်သဝ်းလွႆလၢၼ်း တေဢမ်ႇမီးတီႈယူႇယဝ်ႉ၊ ပေႃးထွၼ်ပၼ်ထႅင်ႈၵေႃႈ တေလႆႈဝႅၼ် တူၵ်းၼႂ်းၼမ်ႉၶူင်းၵူၺ်း။ ၼွၵ်ႈသေၼၼ်ႉ  ပေႃးသိုၵ်းမၢၼ်ႈလႆႈ သၼ် လွႆၸိူဝ်းၼႆႉၵႂႃႇ တေလႆႈတီႈယူႇတီႈသုင်သေ မုင်ႈတူၺ်းၵႂႃႇႁၼ်ၼႂ်းမိူင်းဝႃႉ ပၢင်ယၢင်း- ပၢင်သၢင်းၸိူဝ်းၼႆႉ။ သိုၵ်းမၢၼ်ႈတေပဵၼ်ၾၢႆႇပေႉပုၼ်ႈ။ ပေႃးဝႃႈၾၢႆႇသိုၵ်းမၢၼ်ႈ လႆႈဢဝ်ၶိူင်ႈၵွင်ႈလူင်ၶဝ်ၶိုၼ်ႈတင်ႈဝႆႉထႅင်ႈၸိုင် ၶဝ်ၶႂ်ႈလွၵ်ႇငိုတ်ႈဝႃႉၸိူင်ႉႁိုဝ်ၵေႃႈလႆႈထႅင်ႈ- ဝႃႈၼႆ။

ၸဝ်ႈၸၢႆးထူး ယင်းလၢတ်ႈတီႈၽူႈသိုဝ်ႇၶၢဝ်ႇဝႃႈ- SSPP/SSA တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်မိူဝ်ႈ ဝၼ်းတီႈ 19-24/02/13 ၼၼ်ႉ ႁၢဝ်ႈႁႅင်းဝႆႉ။ SSPP/SSA လႆႈတႅမ်ႈလိၵ်ႈထိုင် တီႈၸွမ်ၸိုင်ႈတဵင်းၸဵင်ႇသေပၢင်တိုၵ်းယဵၼ် ၵႂႃႇၵမ်းၼိုင်ႈ။ ၵူၺ်းၵႃႈ ပၢင်တိုၵ်းၵိုတ်းယဵၼ်ၵႂႃႇသေတႃႉသိုၵ်းမၢၼ်ႈပႆႇထွၼ် ဢွၵ်ႇၼႂ်းၼႃႈလိၼ် SSPP/SSA ၊ သိုၵ်းမၢၼ်ႈ ပႃႈတႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 2 တင်း ၸၵၶ 17 ယင်းတိုၵ်ႉထႅမ်ႁႅင်းသိုၵ်းၶဝ်ႈပၵ်း ဢဝ်တီႈယူႇဝႆႉ ၼႃႈဝၼ်းဢွၵ်ႇမိူင်းသူႈ မီးဢဵၼ်ႁႅင်းမွၵ်ႈ 1,000 ပၢႆ- ဝႃႈၼႆ။

ၼွၵ်ႈသေသိုၵ်းမၢၼ်ႈ ၶလယ 33 (မိူင်းၵၢဝ်) ၊ 291 (ၼမ်ႉပွင်ႈ) ၊ ၶမယ 326 (တၢင်ႉယၢၼ်း) ၶိုၼ်ႈယိုဝ်းတီႈ လွႆလၢၼ်းယဝ်ႉ ထိုင်မႃးဝၼ်းတီႈ 12-13/03/13 ၼႆႉ  သိုၵ်းမၢၼ်ႈတပ်ႉ 291 ၶိုၼ်ႈယိုဝ်းပႃးတပ်ႉ ပၢင်သဝ်း လွႆၸေး (ၼႂ်းၵႄႈမိူင်းၵၢဝ်-တၢင်ႉယၢၼ်း၊ ၾၢႆႇႁွင်ႇလွႆလၢၼ်း) ၶွင်တပ်ႉသိုၵ်းၸိုင်ႈတႆးထႅင်ႈ။
Sourcehttp://www.shan.panglong.org/news/war/3084-2013-03-14-10-10-55.html

သိုၵ်းမၢၼ်ႈၶူဝ်ၼမ်ႉတဵင်းလၢႆးၶႃႈ ယွၼ်းငိုၼ်းပေႃႉထုပ်ႉၵူၼ်းမိူင်း

Tuesday, 19 March 2013 17:25 ပၢင်လူင်

ၸၢႆးတႃး ၸဝ်ႈၵႃးဝႅၼ်ႊလၢႆးၶႃႈ၊ ၺႃးသိုၵ်းမၢၼ်ႈ ဢၼ်ပၵ်း ပႂ်ႉၶူဝ်ၼမ်ႉတဵင်း (တီႈမၢၵ်ႇလၢင်း) ပေႃႉထုပ်ႉ၊ ယွၼ်ႉမၼ်း ၸၢႆးဢွၵ်ႇၶၢဝ်းတၢင်းမႃးတူၵ်းလိုၼ်းၶၢဝ်းပိၵ်ႉဢိုတ်းၶူဝ်၊ သိုၵ်းမၢၼ်ႈယွၼ်းငိုၼ်း 1 မိုၼ်ႇ၊ မၼ်းၸၢႆးသမ်ႉဢမ်ႇမီး ပၼ်။

ၸၢႆးတႃး ၽွင်းယူတ်းယႃႁွႆးၸဵပ်းတီႈႁူင်းယႃ

ပူၼ်ႉမႃးမိူဝ်ႈဝၼ်းတီႈ 13/03/13 ယၢမ်းႁူဝ်ၶမ်ႈမွၵ်ႈ 6 မူင်းၶိုင်ႈ၊ သိုၵ်းမၢၼ်ႈတပ်ႉၶလယ 64 ဢၼ်ပႂ်ႉတီႈၶူဝ်မၢၵ်ႇလၢင်း (ၶူဝ်ၼမ်ႉတဵင်း) ဢၼ်ၶုၼ်သိုၵ်းလူင် ၼေႇမဵဝ်းၸေႃႇဢွၼ်ႁူဝ်၊ ဢဝ်ငုၵ်းၵွင်ႈပွတ်း ပေႃႉထုပ်ႉၸဝ်ႈလူတ်ႉၵႃးဝႅၼ်ႊ ၸိုဝ်ႈႁွင်ႉ ၸၢႆးတႃး ယူႇပွၵ်ႉၼိုင်ႈ (ၼႂ်းဝၢင်းႁေႃ) ဝဵင်းလၢႆးၶႃႈ၊ ထိုင်တီႈပေႃးပဵၼ်လိူတ်ႈပဵၼ်ယၢင် လႆႈၵႂႃႇယူတ်းယႃတူဝ်တီႈႁူင်းယႃဝႆႉ- ၼႆယဝ်ႉ။

လွင်ႈတၢင်းၺႃးထုပ်ႉပေႃႉၼႆႉ ယွၼ်ႉၸၢႆးတႃး ဢွၵ်ႇၶၢဝ်းတၢင်းမႃးတူၵ်းလိုၼ်း ၶၢဝ်းပိၵ်ႉဢိုတ်းၶူဝ် ႁူဝ်ၶမ်ႈ 6 မူင်း၊ ပိူဝ်ႈတႃႇ ၶၢမ်ႈၶူဝ်ၼၼ်ႉ သိုၵ်းမၢၼ်ႈယွၼ်းငိုၼ်း 10,000 ၊ ၸၢႆးတႃးဢမ်ႇမီးငိုၼ်းလႄႈ ယွၼ်းပၼ် 5,000 ပျႃး၊ ႁဵတ်းႁႂ်ႈၶုၼ်သိုၵ်း လူင်ၼေႇမဵဝ်းၸေႃႇ ၸႂ်လမ်သေပေႃႉထုပ်ႉမၼ်း ဝႃႈၼႆ။

လိူဝ်သေၼၼ်ႉ ၼေႇမဵဝ်းၸေႃႇ ယင်းလၢတ်ႈထႅင်ႈဝႃႈ- “ပေႃးၵူၼ်းထိူၼ်ႇယွၼ်းတႄႉ သူပၼ်ႁူဝ်သႅၼ်မၼ်း၊ ငိုၼ်းမိုၼ်ႇ ၼိုင်ႈၵူၺ်းမႂ်းဢမ်ႇၶႂ်ႈပၼ်ၵဝ်ႁႃႉ”- ဝႃႈၼႆ။

ၽွင်းၸၢႆးတႃး ယူတ်းယႃႁွႆးၸဵပ်းယူႇတီႈႁူင်းယႃၼၼ်ႉ သိုၵ်းမၢၼ်ႈၸၼ်ႉပႃႈၼိူဝ်ၶဝ်မႃးယွၼ်းၼွမ်းၽိတ်း (တွင်းပၢၼ်ႇ) ႁႂ်ႈလူင်းလၢႆးမိုဝ်းပၼ်သေတႃႉ ၸၢႆးတႃး ဢမ်ႇယွမ်း။ မၼ်းၸၢႆးလၢတ်ႈတီႈသိုၵ်းမၢၼ်ႈ ၸိူဝ်းၼၼ်ႉဝႃႈ သင်ဝႃႈၵဝ်ၶႃႈပဵၼ်ၵေႃႉ ႁဵတ်းႁၢႆႉဢွၼ်တၢင်းတႄႉ ယႃႇဝႃႈတူဝ်ၶႃႈလႃႈ၊ ၼႃႈႁိူၼ်းၵဝ်ၶႃႈ တၢင်းလင်ယင်းတေဢမ်ႇယူႇလႆႈၵွၼ်ႇ- ဝႃႈၼႆ။

ၽွင်းတႅၼ်းၸႄႈမိူင်းလၢႆးၶႃႈ ၸၢႆးၵျေႃႇၸေႇယ လၢတ်ႈဝႃႈ- တပ်ႉသိုၵ်းဢၼ်ဝႃႈၼႆႉ လီႁဵတ်းၵၢၼ်တီႈ ဢၼ်ၶိုၵ်ႉယႂ်ႇလမ်ႇ လွင်ႈလိူဝ်ၼႆႉ၊ ဝၢၼ်ႈမိူင်းလႅၵ်ႈလၢႆႈၶၢႆႉၸူးၻီႊမွၵ်းၶရေႊသီႊယဝ်ႉလႄႈ လွင်ႈပေႉၵိၼ် ၵူၼ်းဝၢၼ်ႈၵူၼ်းမိူင်းၸိူင်ႉၼႆ ဢမ်ႇၵိုင်ႇလီမီးယဝ်ႉ၊ ယွၼ်ႉၸုမ်းယိပ်းၵွင်ႈၵၢင်ႇၸိူင်ႉၼႆလႄႈ ၵူၼ်းမိူင်းလႆႈ ၵူမ်ႈႁူဝ်တုၵ်ႉၶယၢပ်ႇၽိုတ်ႇမႃး 60 ပီမိူင်း၊ ထိုင်ၶၢဝ်းယၢမ်းထုၵ်ႇလႆႈၶိုၼ်းမူၼ်ႉမႄးတၢင်းတိုဝ်းၵမ်ယွၵ်း/ ၸရိတ်ႉတလုၸိူဝ်းၼႆႉယဝ်ႉ- ဝႃႈၼႆ။

ဢၼ်သိုၵ်းမၢၼ်ႈပိၵ်ႉဢိုတ်းၶူဝ်မၢၵ်ႇလၢင်း ႁူဝ်ၶမ်ႈ 6 မူင်းၼႆႉ ႁဵတ်းႁႂ်ႈၵူၼ်းမိူင်းႁဵတ်းၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇ။ ၼင်ႇႁိုဝ်ႁႂ်ႈမီးၵၢၼ်လိူၼ်ႈၶၢႆႉပၼ်ၶၢဝ်းယၢမ်းပိုတ်ႇၶူဝ် (ၼမ်ႉတဵင်း)ၵႂႃႇထႅင်ႈၼၼ်ႉ ၽွင်းတႅၼ်း လၢႆးၶႃႈၵေႃႉၼိုင်ႈၵေႃႈ ယၢမ်ႈတၢင်ႇလၢတ်ႈတီႈ ၸဝ်ႈသိုၵ်းလူင်ဢွင်ႇတူႇ (ၽွင်းလူင်ႁွင်ႈၵၢၼ်လူင်ၾၢႆႇႁူမ်ႇလူမ်ႈ လႄႈလႅၼ်လိၼ် လူင်ပွင်ၸိုင်ႈ ၸႄႈမိူင်းတႆး) ၽွင်းမႃးႁွတ်ႈထိုင်လၢႆးၶႃႈယူႇ၊ ၵူၺ်းၵႃႈ ဝၢႆးမႃးၵေႃႈ ဢမ်ႇႁၼ်ပိူင်ႈသင်မႃး- ၼႆယဝ်ႉ။

Source http://www.shan.panglong.org/news/human-rights/3093-2013-03-19-10-27-51.html

သိုၵ်းမၢၼ်ႈယႃႉလွင်ႈငမ်းယဵၼ် ယိုဝ်းသိုၵ်းတႆးပွတ်းႁူဝ်မိူင်း

Monday, 18 March 2013 20:51 ပၢင်လူင်

သိုၵ်းမၢၼ်ႈၶိုၼ်ႈယိုဝ်းတပ်ႉလွႆလၢၼ်း ႁိမ်းလွႆၼၵႃး ၾၢႆႇႁွင်ႇႁူဝ်မိူင်း ၶွင်တပ်ႉသိုၵ်းၸိုင်ႈတႆး (RCSS/SSA) ။ သိုၵ်းတႆးဢမ်ႇယိုဝ်းတွပ်ႇ ၵွပ်ႈပဵၼ်တပ်ႉၽၢင်းဢၼ် သိုၵ်းတႆးထွၼ်ဢွၵ်ႇယဝ်ႉလႄႈ ဢမ်ႇတုမ်ႉတိူဝ်ႉသိုၵ်းတႆး၊ ၵူဝ်ၵူၼ်းမိူင်း လိူတ်ႇမႆႈၸွမ်းၽေးသိုၵ်းလႄႈ ဢမ်ႇၶႂ်ႈယႃႉ လွင်ႈငမ်းယဵၼ်။

တပ်ႉသိုၵ်းၸိုင်ႈတႆး SSA တီႈတပ်ႉပၢင်သဝ်းၼႂ်းၸိုင်ႈတႆးတီႈၼိုင်ႈ Photo: jamesrobertfuller.photoshelter.com

ဝၼ်းထိ 15/03/13 ပွတ်းၼႂ်ယၢမ်း 9 မူင်းၵမ်းၼိုင်ႈ၊ ယၢမ်း 10 တေႃႇထိုင် 11 မူင်းၵမ်းၼိုင်ႈ၊ သိုၵ်းမၢၼ်ႈဢဝ်ၶိူင်ႈၵွင်ႈလူင် 60mm, 81mm ယိုဝ်းသႂ်ႇတီႈတပ်ႉပၢင်သဝ်းၶွင် တပ်ႉသိုၵ်းၸိုင်ႈတႆး (RCSS/SSA) လွႆတႆးလႅင်း၊ တီႈတပ်ႉလွႆလၢၼ်း၊ ႁိမ်းလွႆၼၵႃး (ၾၢႆႇႁွင်ႇႁူဝ်မိူင်း) ။ ၼွၵ်ႈသေၼၼ်ႉ ဢဝ်ၵွင်ႈၸၢၵ်ႈလူင် ယိုဝ်းသႂ်ႇပဵၼ်ၵမ်းပဵၼ်ၵမ်း။ ထိုင်မႃးဝၼ်းထိ 16/03/13 ၵေႃႈ တင်ႈတႄႇယၢမ်း 11 မူင်းၵေႃႈ သိုၵ်းမၢၼ်ႈ ဢဝ်ၶိူင်ႈၵွင်ႈလူင်/ၵွင်ႈၸၢၵ်ႈၸိူဝ်းၼႆႉ ယိုဝ်းသႂ်ႇထႅင်ႈ၊ ယိုဝ်းသႂ်ႇပဵၼ်ၸုပ်ႈပဵၼ်ၸုပ်ႈ တေႃႇထိုင်ယၢမ်းဝၢႆးဝၼ်း ႁူဝ်ၶမ်ႈ တင်းမူတ်းမွၵ်ႈ 30 လုၵ်ႈပၢႆ- ၼႆယဝ်ႉ။

သိုၵ်းမၢၼ်ႈၸိူဝ်းဢဝ်ၶိူင်ႈၵွင်ႈလူင်/ၵွင်ႈၸၢၵ်ႈယိုဝ်းသႂ်ႇတပ်ႉလွႆလၢၼ်း၊ ပႃးၸဵမ်သိုၵ်းၸိူဝ်းၵၢၼ်းၶိုၼ်ႈၸိူဝ်းၼႆႉ တင်းမူတ်းမီး 3 တပ်ႉ၊ တပ်ႉၵွင် 286, 287, 132 ႁူမ်ႈႁႅင်းသိုၵ်း 200 ပၢႆ၊ ၸႅၵ်ႇပဵၼ် 3 ငႃးသိုၵ်းသေ ၶိုၼ်ႈယိုဝ်း။ ယင်းလႆႈႁူႉဝႃႈ ဢၼ်မႃးယိုဝ်း တပ်ႉလွႆလၢၼ်း ၶွင် RCSS/SSA ၵမ်းၼႆႉ သိုၵ်းမၢၼ်ႈႁွင်ႉမႃး ပႃးၸုမ်းပီႇတုၸိတ်ႉႁူဝ်မိူင်း (SSS) ဢၼ်ၸဝ်ႈမႁႃၵျႃႇဢွၼ်ႁူဝ်။ ဢိင်ၼိူဝ်သိုၵ်းမၢၼ်ႈႁွင်ႉသေ ၸုမ်းပီႇတုၸိတ်ႉ ႁူဝ်မိူင်း လႆႈႁွင်ႉဢဝ်ႁႅင်းၵူၼ်းပွတ်းၵဵင်းတွင်း/ၼမ်ႉၸၢင် မွၵ်ႈ 50-60 မႃးထႅမ် ပွတ်းႁူဝ်မိူင်း ထႅင်ႈ၊ ႁႅင်းပီႇတုၸိတ်ႉႁူဝ်မိူင်းဢၼ်မႃးတူင်ႉၼိုင်ၸွမ်းသိုၵ်းမၢၼ်ႈၵမ်းၼႆႉမီး 100 ပၢႆ၊ ႁူမ်ႈႁႅင်းသိုၵ်းမၢၼ်ႈ တင်းၸုမ်း ပီႇတုၸိတ်ႉ တင်းမူတ်းႁႅင်းၵူၼ်း 300 ပၢႆ၊ ဢၼ်ၶိုၼ်ႈယိုဝ်းၸွမ်း ငႃးသိုၵ်းမၢၼ်ႈ 3 ငႃးၼၼ်ႉၵေႃႈ ပႃးၸုမ်းပီႇတုၸိတ်ႉႁူဝ်မိူင်း-ၼႆယဝ်ႉ။

သိုၵ်းမၢၼ်ႈၸႅၵ်ႇပဵၼ် 3 ၸုမ်း၊ ပၵ်းယူႇ 5 တီႈ- 1.တပ်ႉမႄႈဢေႃး၊ 2.ႁူဝ်ႁႃႉ၊ 3.ၼမ်ႉၸႄႉ၊ 4.လွႆသၢမ်မိူင်း၊ 5.ဝၢၼ်ႈၵဝ်ႇလွႆလၢၼ်း ၸိူဝ်းၼႆႉသေ ဢဝ်ၶိူင်ႈၵွင်ႈလူင် 81mm, 60mm တင်းၵွင်ႈၸၢၵ်ႈ ယိုဝ်းသႂ်ႇလွႆၼၵႃး လႄႈလွႆလၢၼ်း။ ၵူၺ်းၵႃႈ တပ်ႉၸိူဝ်းၼႆႉ ဢမ်ႇမီးသိုၵ်းတႆး၊ ပဵၼ်တပ်ႉၽၢင်းၵူၺ်း၊ သိုၵ်းတႆးထွၼ်ဢွၵ်ႇ ပူၼ်ႉမႃးၸဵမ်မိူဝ်ႈ ဝၼ်းထိ 11/03/13 - ၸဝ်ႈၼႃႈတီႈၼႂ်း RCSS/SSA ၸဝ်ႈၼိုင်ႈလၢတ်ႈၼႄၼင်ႇၼႆ။

မၼ်းၸဝ်ႈသိုပ်ႇလၢတ်ႈဝႃႈ- ႁိမ်းႁွမ်းၸိူဝ်းၼၼ်ႉမီးသိုၵ်းတႆးပၵ်းယူႇဝႆႉယူႇ၊ ၵူၺ်းၵႃႈဢမ်ႇယိုဝ်းတွပ်ႇၶိုၼ်း၊ ၵွပ်ႈဝႃႈ- 1.ၾၢႆႇသိုၵ်း တႆး RCSS/SSA ထွၼ်ပၼ်ယဝ်ႉ၊ သိုၵ်းမၢၼ်ႈၶိုၼ်ႈယိုဝ်းၵေႃႈဢမ်ႇတုမ်ႉတိူဝ်ႉ RCSS/SSA ။ 2.ပေႃးယိုဝ်းတွပ်ႇၶိုၼ်းၵူဝ်ၵူၼ်းမိူင်း ႁိမ်းႁွမ်းတုၵ်ႉယၢၵ်ႈလိူတ်ႇမႆႈၸွမ်း။ 3.ၵွပ်ႈပဵၼ်ၸုမ်းဢဝ် ငမ်းယဵၼ်သေ ဢမ်ႇၶႂ်ႈယႃႉလွင်ႈငမ်းယဵၼ် ဢၼ်သွင်ၾၢႆႇႁူမ်ႈၵၼ်ၵေႃႇ သၢင်ႈမႃး။ ၵွပ်ႈဢမ်ႇၶႂ်ႈယႃႉ လွင်ႈငမ်းယဵၼ်လႄႈ ၸွမ်းၼင်ႇၾၢႆႇမၢၼ်ႈတုၵ်းယွၼ်းမႃးႁႂ်ႈထွၼ်ပၼ်တပ်ႉၵေႃႈ သိုၵ်းတႆးယွမ်းထွၼ် ပၼ်လီလီ၊ ထွၼ်ဢွၵ်ႇၸဵမ်မိူဝ်ႈ ဝၼ်းထိ 11/03/13 ပူၼ်ႉမႃးယဝ်ႉ၊ လွင်ႈသိုၵ်းတႆးထွၼ်ဢွၵ်ႇၼႆႉၵေႃႈ ၸႅင်ႈပၼ်ၸဝ်ႈၼႃႈတီႈ မၢၼ်ႈၸၼ်ႉၼိူဝ်ယူႇ၊ ၵူၺ်းၵႃႈ ၾၢႆႇသိုၵ်းမၢၼ်ႈတေဢမ်ႇႁူႉႁိုဝ်၊ ဢၼ်ၶဝ်မႃးယိုဝ်းသႂ်ႇ တပ်ႉၽၢင်းၵမ်းၼႆႉၵေႃႈ ၵွပ်ႈၸၢင်ႈပဵၼ် ယွၼ်ႉၶဝ်ထၢင်ႇဝႃႈ တိုၵ်ႉမီးသိုၵ်းတႆးယူႇဝႆႉ- ဝႃႈၼႆ။

မိူဝ်ႈဝႃးၼႆႉ (ဝၼ်းထိ 17) ဢမ်ႇငိၼ်းသဵင်ၵွင်ႈ၊  သိုၵ်းမၢၼ်ႈလႅပ်ႈၶိုၼ်ႈၽႅဝ်ၼိူဝ်တပ်ႉ (လွႆလၢၼ်း) ယဝ်ႉ။ ႁၼ်သိုၵ်းမၢၼ်ႈႁၢမ် ၵူၼ်းဝၢတ်ႇၸဵပ်းၶဝ်ၽၢၼ်ႇမႃးယူႇ၊ လၢမ်းဝႃႈ သိုၵ်းမၢၼ်ႈလႅပ်ႈၽႃႇၺႃး မၢၵ်ႇသိုၵ်းတႆးႁၢင်ႈၵၢင်ဝႆႉ။ မိူဝ်ႈဝၼ်းထိ 16 ၼၼ်ႉ သိုၵ်းမၢၼ်ႈၶိုၼ်ႈၵႂႃႇၽႃႇၺႃးမၢၵ်ႇလႄႈ  သမ်ႉထၢင်ႇဝႃႈ သိုၵ်းတႆးယူႇဝႆႉ ၼိူဝ်တပ်ႉသေ ၸင်ႇယိုဝ်းသႂ်ႇတပ်ႉယူႇတိၵ်းတိၵ်းၵေႃႈ ပဵၼ်လႆႈ-ၵူၼ်းဝၢၼ်ႈပွတ်းမႄႈဢေႃး ၵေႃႉၼိုင်ႈ လၢတ်ႈ ၼင်ႇၼႆ။

လွင်ႈၸိူဝ်းၼႆႉ ပဵၼ်မႃးဝၢႆးသေပူၼ်ႉမႃးမိူဝ်ႈဝၼ်းထိ 19/02/13 ၵႅမ်ၽူႈၵွၼ်းသိုၵ်းသုင်သုတ်း ၸွမ်သိုၵ်းလူင်ၸူဝ်းဝိၼ်း၊ ၽူႈၵွၼ်း တပ်ႉလိၼ် ၸွမ်သိုၵ်းဢွင်ႇတၢၼ်းထုတ်ႉ၊ ၽူႈၵွၼ်းတိူင်းသိုၵ်းဝၼ်းဢွၵ်ႇ (တူၼ်ႈတီး)၊ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ၶီႇႁိူဝ်းဝိၼ်မႃးတီႈႁူဝ်မိူင်း၊ မႃးႁဵတ်းပၢင်ၵုမ်ၵၼ်တင်း ပိဝ်ႇႁႃႇမူး တီႈႁူဝ်မိူင်းသေပွၵ်ႈမိူဝ်းၵႂႃႇ။ ဝၢႆးၼၼ်ႉ ထိုင်မႃးဝၼ်းထိ 24/02/13 ယူႇတီႈလူင်ပွင်ၸိုင်ႈမၢၼ်ႈ လႆႈတႅမ်ႈလိၵ်ႈ မႃးၸူးတီႈလွႆတႆးလႅင်း၊ တုၵ်းယွၼ်းႁႂ်ႈထွၼ်သိုၵ်းပၼ် 2 တပ်ႉ- 1.တပ်ႉလွႆလၢၼ်း ၾၢႆႇႁွင်ႇႁူဝ်မိူင်း။ 2.တပ်ႉလွႆမူတ်ႉၼၢင်းလႅၼ်း တီႈမိူင်းထႃး။ ဝၼ်းလိုၼ်းသုတ်း ႁႂ်ႈထွၼ်ဢွၵ်ႇပၼ်ၼႂ်းဝၼ်းထိ 28/02/13 ။ လိူဝ်ၼၼ်ႉယင်း လႆႈႁူႉဝႃႈ တပ်ႉမူတ်ႉၼၢင်းလႅၼ်း တီႈမိူင်းထႃးၼၼ်ႉ တိူင်းသိုၵ်းသၢမ်ၸဵင်ႇ (ၵဵင်းတုင်) တုၵ်းယွၼ်း ႁႂ်ႈထွၼ်ပၼ်။ တပ်ႉလွႆလၢၼ်းသမ်ႉ တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်)တုၵ်းယွၼ်း ႁႂ်ႈထွၼ်ဢွၵ်ႇ ပၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ တၢင်းလွႆတႆးလႅင်း (RCSS/SSA) တွပ်ႇလၢတ်ႈဝႃႈ- ဢမ်ႇၸၢင်ႈထွၼ်ပၼ်၊ ၵွပ်ႈဝႃႈ ယူႇၼႂ်းၶေႃႈတူၵ်းလူင်းၵၼ် မိူဝ်ႈဢုပ်ႇဢူဝ်းလွင်ႈငမ်းယဵၼ် ႁႂ်ႈပဵၼ်ပိုၼ်ႉတီႈပူၵ်းပွင် RCSS/SSA ။ ပေႃးဝႃႈၾၢႆႇ RCSS/SSA ဢမ်ႇယွမ်းထွၼ်ပၼ်ၵေႃႈ ပူၼ်ႉမႃးမိူဝ်ႈဝူင်ႈပူၼ်ႉ တပ်ႉသိုၵ်းမၢၼ်ႈထႅမ်ႁႅင်းသိုၵ်း  တင်း ၶိူင်ႈၵွင်ႈလူင်မႃးတၢင်းႁူဝ်မိူင်း၊ လႆႈငိၼ်းဝႃႈ ႁႅင်းသိုၵ်းတႃႇၵႃးသိုၵ်း 13 လမ်း၊ ၶိူင်ႈၵွင်ႈလူင် 105mm, 120mm ၸိူဝ်းၼႆႉ၊ ထိုင်မႃးဝၼ်းထိ 11/03/13 သိုၵ်းတႆးထွၼ်ဢွၵ်ႇပၼ်သေတႃႉ ဝၼ်းထိ 15/03/13 ၵေႃႈ သိုၵ်းမၢၼ်ႈႁၢင်ႈသိုၵ်းယိုဝ်းတပ်ႉလွႆလၢၼ်း။

ၾၢႆႇၼိုင်ႈ သိုၵ်းမၢၼ်ႈဢဝ်ၶိူင်ႈၵွင်ႈလူင် 120mm  2-3 လဝ်း မႃးတင်ႈဝႆႉတီႈၼမ်ႉမႄႈၵုၼ်း (ၾၢႆႇဢွၵ်ႇ ႁူဝ်မိူင်း)။ ၵူၼ်းၼႂ်းပိုၼ်ႉ တီႈလၢတ်ႈဝႃႈ- ၽွင်းဢဝ်မႃးၼၼ်ႉ မိူဝ်ႈတႄႇမၼ်း သိုၵ်းမၢၼ်ႈဢၢၼ်းဢဝ်ႁႅင်းၵူၼ်း လၢၵ်ႈၶိုၼ်ႈၼိူဝ်တပ်ႉ၊ ၵူၺ်းၵႃႈႁႅင်းၵူၼ်း ဢမ်ႇပေႉလႆႈလႄႈ ဝၢႆးမႃးလႆႈၵႂႃႇဢဝ်လူတ်ႉၵႃး မႅၵ်ႊၶြူဝ်ႊ လၢၵ်ႈၸၼ်ၶိုၼ်ႈၵႂႃႇဝႆႉ။ လၢမ်းဝႃႈ ၶိူင်ႈၵွင်ႈလူင်ၼႆႉ ပေႃးယိုဝ်းတေထိုင် လွႆတႆးလႅင်း- ဝႃႈၼႆ။

sourcehttp ://www.panglong.org