Nang Pong Noon

သိုၵ်းမၢၼ်ႈယႃႉလွင်ႈငမ်းယဵၼ် ယိုဝ်းသိုၵ်းတႆးပွတ်းႁူဝ်မိူင်း

Monday, 18 March 2013 20:51 ပၢင်လူင်

သိုၵ်းမၢၼ်ႈၶိုၼ်ႈယိုဝ်းတပ်ႉလွႆလၢၼ်း ႁိမ်းလွႆၼၵႃး ၾၢႆႇႁွင်ႇႁူဝ်မိူင်း ၶွင်တပ်ႉသိုၵ်းၸိုင်ႈတႆး (RCSS/SSA) ။ သိုၵ်းတႆးဢမ်ႇယိုဝ်းတွပ်ႇ ၵွပ်ႈပဵၼ်တပ်ႉၽၢင်းဢၼ် သိုၵ်းတႆးထွၼ်ဢွၵ်ႇယဝ်ႉလႄႈ ဢမ်ႇတုမ်ႉတိူဝ်ႉသိုၵ်းတႆး၊ ၵူဝ်ၵူၼ်းမိူင်း လိူတ်ႇမႆႈၸွမ်းၽေးသိုၵ်းလႄႈ ဢမ်ႇၶႂ်ႈယႃႉ လွင်ႈငမ်းယဵၼ်။

တပ်ႉသိုၵ်းၸိုင်ႈတႆး SSA တီႈတပ်ႉပၢင်သဝ်းၼႂ်းၸိုင်ႈတႆးတီႈၼိုင်ႈ Photo: jamesrobertfuller.photoshelter.com

ဝၼ်းထိ 15/03/13 ပွတ်းၼႂ်ယၢမ်း 9 မူင်းၵမ်းၼိုင်ႈ၊ ယၢမ်း 10 တေႃႇထိုင် 11 မူင်းၵမ်းၼိုင်ႈ၊ သိုၵ်းမၢၼ်ႈဢဝ်ၶိူင်ႈၵွင်ႈလူင် 60mm, 81mm ယိုဝ်းသႂ်ႇတီႈတပ်ႉပၢင်သဝ်းၶွင် တပ်ႉသိုၵ်းၸိုင်ႈတႆး (RCSS/SSA) လွႆတႆးလႅင်း၊ တီႈတပ်ႉလွႆလၢၼ်း၊ ႁိမ်းလွႆၼၵႃး (ၾၢႆႇႁွင်ႇႁူဝ်မိူင်း) ။ ၼွၵ်ႈသေၼၼ်ႉ ဢဝ်ၵွင်ႈၸၢၵ်ႈလူင် ယိုဝ်းသႂ်ႇပဵၼ်ၵမ်းပဵၼ်ၵမ်း။ ထိုင်မႃးဝၼ်းထိ 16/03/13 ၵေႃႈ တင်ႈတႄႇယၢမ်း 11 မူင်းၵေႃႈ သိုၵ်းမၢၼ်ႈ ဢဝ်ၶိူင်ႈၵွင်ႈလူင်/ၵွင်ႈၸၢၵ်ႈၸိူဝ်းၼႆႉ ယိုဝ်းသႂ်ႇထႅင်ႈ၊ ယိုဝ်းသႂ်ႇပဵၼ်ၸုပ်ႈပဵၼ်ၸုပ်ႈ တေႃႇထိုင်ယၢမ်းဝၢႆးဝၼ်း ႁူဝ်ၶမ်ႈ တင်းမူတ်းမွၵ်ႈ 30 လုၵ်ႈပၢႆ- ၼႆယဝ်ႉ။

သိုၵ်းမၢၼ်ႈၸိူဝ်းဢဝ်ၶိူင်ႈၵွင်ႈလူင်/ၵွင်ႈၸၢၵ်ႈယိုဝ်းသႂ်ႇတပ်ႉလွႆလၢၼ်း၊ ပႃးၸဵမ်သိုၵ်းၸိူဝ်းၵၢၼ်းၶိုၼ်ႈၸိူဝ်းၼႆႉ တင်းမူတ်းမီး 3 တပ်ႉ၊ တပ်ႉၵွင် 286, 287, 132 ႁူမ်ႈႁႅင်းသိုၵ်း 200 ပၢႆ၊ ၸႅၵ်ႇပဵၼ် 3 ငႃးသိုၵ်းသေ ၶိုၼ်ႈယိုဝ်း။ ယင်းလႆႈႁူႉဝႃႈ ဢၼ်မႃးယိုဝ်း တပ်ႉလွႆလၢၼ်း ၶွင် RCSS/SSA ၵမ်းၼႆႉ သိုၵ်းမၢၼ်ႈႁွင်ႉမႃး ပႃးၸုမ်းပီႇတုၸိတ်ႉႁူဝ်မိူင်း (SSS) ဢၼ်ၸဝ်ႈမႁႃၵျႃႇဢွၼ်ႁူဝ်။ ဢိင်ၼိူဝ်သိုၵ်းမၢၼ်ႈႁွင်ႉသေ ၸုမ်းပီႇတုၸိတ်ႉ ႁူဝ်မိူင်း လႆႈႁွင်ႉဢဝ်ႁႅင်းၵူၼ်းပွတ်းၵဵင်းတွင်း/ၼမ်ႉၸၢင် မွၵ်ႈ 50-60 မႃးထႅမ် ပွတ်းႁူဝ်မိူင်း ထႅင်ႈ၊ ႁႅင်းပီႇတုၸိတ်ႉႁူဝ်မိူင်းဢၼ်မႃးတူင်ႉၼိုင်ၸွမ်းသိုၵ်းမၢၼ်ႈၵမ်းၼႆႉမီး 100 ပၢႆ၊ ႁူမ်ႈႁႅင်းသိုၵ်းမၢၼ်ႈ တင်းၸုမ်း ပီႇတုၸိတ်ႉ တင်းမူတ်းႁႅင်းၵူၼ်း 300 ပၢႆ၊ ဢၼ်ၶိုၼ်ႈယိုဝ်းၸွမ်း ငႃးသိုၵ်းမၢၼ်ႈ 3 ငႃးၼၼ်ႉၵေႃႈ ပႃးၸုမ်းပီႇတုၸိတ်ႉႁူဝ်မိူင်း-ၼႆယဝ်ႉ။

သိုၵ်းမၢၼ်ႈၸႅၵ်ႇပဵၼ် 3 ၸုမ်း၊ ပၵ်းယူႇ 5 တီႈ- 1.တပ်ႉမႄႈဢေႃး၊ 2.ႁူဝ်ႁႃႉ၊ 3.ၼမ်ႉၸႄႉ၊ 4.လွႆသၢမ်မိူင်း၊ 5.ဝၢၼ်ႈၵဝ်ႇလွႆလၢၼ်း ၸိူဝ်းၼႆႉသေ ဢဝ်ၶိူင်ႈၵွင်ႈလူင် 81mm, 60mm တင်းၵွင်ႈၸၢၵ်ႈ ယိုဝ်းသႂ်ႇလွႆၼၵႃး လႄႈလွႆလၢၼ်း။ ၵူၺ်းၵႃႈ တပ်ႉၸိူဝ်းၼႆႉ ဢမ်ႇမီးသိုၵ်းတႆး၊ ပဵၼ်တပ်ႉၽၢင်းၵူၺ်း၊ သိုၵ်းတႆးထွၼ်ဢွၵ်ႇ ပူၼ်ႉမႃးၸဵမ်မိူဝ်ႈ ဝၼ်းထိ 11/03/13 - ၸဝ်ႈၼႃႈတီႈၼႂ်း RCSS/SSA ၸဝ်ႈၼိုင်ႈလၢတ်ႈၼႄၼင်ႇၼႆ။

မၼ်းၸဝ်ႈသိုပ်ႇလၢတ်ႈဝႃႈ- ႁိမ်းႁွမ်းၸိူဝ်းၼၼ်ႉမီးသိုၵ်းတႆးပၵ်းယူႇဝႆႉယူႇ၊ ၵူၺ်းၵႃႈဢမ်ႇယိုဝ်းတွပ်ႇၶိုၼ်း၊ ၵွပ်ႈဝႃႈ- 1.ၾၢႆႇသိုၵ်း တႆး RCSS/SSA ထွၼ်ပၼ်ယဝ်ႉ၊ သိုၵ်းမၢၼ်ႈၶိုၼ်ႈယိုဝ်းၵေႃႈဢမ်ႇတုမ်ႉတိူဝ်ႉ RCSS/SSA ။ 2.ပေႃးယိုဝ်းတွပ်ႇၶိုၼ်းၵူဝ်ၵူၼ်းမိူင်း ႁိမ်းႁွမ်းတုၵ်ႉယၢၵ်ႈလိူတ်ႇမႆႈၸွမ်း။ 3.ၵွပ်ႈပဵၼ်ၸုမ်းဢဝ် ငမ်းယဵၼ်သေ ဢမ်ႇၶႂ်ႈယႃႉလွင်ႈငမ်းယဵၼ် ဢၼ်သွင်ၾၢႆႇႁူမ်ႈၵၼ်ၵေႃႇ သၢင်ႈမႃး။ ၵွပ်ႈဢမ်ႇၶႂ်ႈယႃႉ လွင်ႈငမ်းယဵၼ်လႄႈ ၸွမ်းၼင်ႇၾၢႆႇမၢၼ်ႈတုၵ်းယွၼ်းမႃးႁႂ်ႈထွၼ်ပၼ်တပ်ႉၵေႃႈ သိုၵ်းတႆးယွမ်းထွၼ် ပၼ်လီလီ၊ ထွၼ်ဢွၵ်ႇၸဵမ်မိူဝ်ႈ ဝၼ်းထိ 11/03/13 ပူၼ်ႉမႃးယဝ်ႉ၊ လွင်ႈသိုၵ်းတႆးထွၼ်ဢွၵ်ႇၼႆႉၵေႃႈ ၸႅင်ႈပၼ်ၸဝ်ႈၼႃႈတီႈ မၢၼ်ႈၸၼ်ႉၼိူဝ်ယူႇ၊ ၵူၺ်းၵႃႈ ၾၢႆႇသိုၵ်းမၢၼ်ႈတေဢမ်ႇႁူႉႁိုဝ်၊ ဢၼ်ၶဝ်မႃးယိုဝ်းသႂ်ႇ တပ်ႉၽၢင်းၵမ်းၼႆႉၵေႃႈ ၵွပ်ႈၸၢင်ႈပဵၼ် ယွၼ်ႉၶဝ်ထၢင်ႇဝႃႈ တိုၵ်ႉမီးသိုၵ်းတႆးယူႇဝႆႉ- ဝႃႈၼႆ။

မိူဝ်ႈဝႃးၼႆႉ (ဝၼ်းထိ 17) ဢမ်ႇငိၼ်းသဵင်ၵွင်ႈ၊  သိုၵ်းမၢၼ်ႈလႅပ်ႈၶိုၼ်ႈၽႅဝ်ၼိူဝ်တပ်ႉ (လွႆလၢၼ်း) ယဝ်ႉ။ ႁၼ်သိုၵ်းမၢၼ်ႈႁၢမ် ၵူၼ်းဝၢတ်ႇၸဵပ်းၶဝ်ၽၢၼ်ႇမႃးယူႇ၊ လၢမ်းဝႃႈ သိုၵ်းမၢၼ်ႈလႅပ်ႈၽႃႇၺႃး မၢၵ်ႇသိုၵ်းတႆးႁၢင်ႈၵၢင်ဝႆႉ။ မိူဝ်ႈဝၼ်းထိ 16 ၼၼ်ႉ သိုၵ်းမၢၼ်ႈၶိုၼ်ႈၵႂႃႇၽႃႇၺႃးမၢၵ်ႇလႄႈ  သမ်ႉထၢင်ႇဝႃႈ သိုၵ်းတႆးယူႇဝႆႉ ၼိူဝ်တပ်ႉသေ ၸင်ႇယိုဝ်းသႂ်ႇတပ်ႉယူႇတိၵ်းတိၵ်းၵေႃႈ ပဵၼ်လႆႈ-ၵူၼ်းဝၢၼ်ႈပွတ်းမႄႈဢေႃး ၵေႃႉၼိုင်ႈ လၢတ်ႈ ၼင်ႇၼႆ။

လွင်ႈၸိူဝ်းၼႆႉ ပဵၼ်မႃးဝၢႆးသေပူၼ်ႉမႃးမိူဝ်ႈဝၼ်းထိ 19/02/13 ၵႅမ်ၽူႈၵွၼ်းသိုၵ်းသုင်သုတ်း ၸွမ်သိုၵ်းလူင်ၸူဝ်းဝိၼ်း၊ ၽူႈၵွၼ်း တပ်ႉလိၼ် ၸွမ်သိုၵ်းဢွင်ႇတၢၼ်းထုတ်ႉ၊ ၽူႈၵွၼ်းတိူင်းသိုၵ်းဝၼ်းဢွၵ်ႇ (တူၼ်ႈတီး)၊ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ၶီႇႁိူဝ်းဝိၼ်မႃးတီႈႁူဝ်မိူင်း၊ မႃးႁဵတ်းပၢင်ၵုမ်ၵၼ်တင်း ပိဝ်ႇႁႃႇမူး တီႈႁူဝ်မိူင်းသေပွၵ်ႈမိူဝ်းၵႂႃႇ။ ဝၢႆးၼၼ်ႉ ထိုင်မႃးဝၼ်းထိ 24/02/13 ယူႇတီႈလူင်ပွင်ၸိုင်ႈမၢၼ်ႈ လႆႈတႅမ်ႈလိၵ်ႈ မႃးၸူးတီႈလွႆတႆးလႅင်း၊ တုၵ်းယွၼ်းႁႂ်ႈထွၼ်သိုၵ်းပၼ် 2 တပ်ႉ- 1.တပ်ႉလွႆလၢၼ်း ၾၢႆႇႁွင်ႇႁူဝ်မိူင်း။ 2.တပ်ႉလွႆမူတ်ႉၼၢင်းလႅၼ်း တီႈမိူင်းထႃး။ ဝၼ်းလိုၼ်းသုတ်း ႁႂ်ႈထွၼ်ဢွၵ်ႇပၼ်ၼႂ်းဝၼ်းထိ 28/02/13 ။ လိူဝ်ၼၼ်ႉယင်း လႆႈႁူႉဝႃႈ တပ်ႉမူတ်ႉၼၢင်းလႅၼ်း တီႈမိူင်းထႃးၼၼ်ႉ တိူင်းသိုၵ်းသၢမ်ၸဵင်ႇ (ၵဵင်းတုင်) တုၵ်းယွၼ်း ႁႂ်ႈထွၼ်ပၼ်။ တပ်ႉလွႆလၢၼ်းသမ်ႉ တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်)တုၵ်းယွၼ်း ႁႂ်ႈထွၼ်ဢွၵ်ႇ ပၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ တၢင်းလွႆတႆးလႅင်း (RCSS/SSA) တွပ်ႇလၢတ်ႈဝႃႈ- ဢမ်ႇၸၢင်ႈထွၼ်ပၼ်၊ ၵွပ်ႈဝႃႈ ယူႇၼႂ်းၶေႃႈတူၵ်းလူင်းၵၼ် မိူဝ်ႈဢုပ်ႇဢူဝ်းလွင်ႈငမ်းယဵၼ် ႁႂ်ႈပဵၼ်ပိုၼ်ႉတီႈပူၵ်းပွင် RCSS/SSA ။ ပေႃးဝႃႈၾၢႆႇ RCSS/SSA ဢမ်ႇယွမ်းထွၼ်ပၼ်ၵေႃႈ ပူၼ်ႉမႃးမိူဝ်ႈဝူင်ႈပူၼ်ႉ တပ်ႉသိုၵ်းမၢၼ်ႈထႅမ်ႁႅင်းသိုၵ်း  တင်း ၶိူင်ႈၵွင်ႈလူင်မႃးတၢင်းႁူဝ်မိူင်း၊ လႆႈငိၼ်းဝႃႈ ႁႅင်းသိုၵ်းတႃႇၵႃးသိုၵ်း 13 လမ်း၊ ၶိူင်ႈၵွင်ႈလူင် 105mm, 120mm ၸိူဝ်းၼႆႉ၊ ထိုင်မႃးဝၼ်းထိ 11/03/13 သိုၵ်းတႆးထွၼ်ဢွၵ်ႇပၼ်သေတႃႉ ဝၼ်းထိ 15/03/13 ၵေႃႈ သိုၵ်းမၢၼ်ႈႁၢင်ႈသိုၵ်းယိုဝ်းတပ်ႉလွႆလၢၼ်း။

ၾၢႆႇၼိုင်ႈ သိုၵ်းမၢၼ်ႈဢဝ်ၶိူင်ႈၵွင်ႈလူင် 120mm  2-3 လဝ်း မႃးတင်ႈဝႆႉတီႈၼမ်ႉမႄႈၵုၼ်း (ၾၢႆႇဢွၵ်ႇ ႁူဝ်မိူင်း)။ ၵူၼ်းၼႂ်းပိုၼ်ႉ တီႈလၢတ်ႈဝႃႈ- ၽွင်းဢဝ်မႃးၼၼ်ႉ မိူဝ်ႈတႄႇမၼ်း သိုၵ်းမၢၼ်ႈဢၢၼ်းဢဝ်ႁႅင်းၵူၼ်း လၢၵ်ႈၶိုၼ်ႈၼိူဝ်တပ်ႉ၊ ၵူၺ်းၵႃႈႁႅင်းၵူၼ်း ဢမ်ႇပေႉလႆႈလႄႈ ဝၢႆးမႃးလႆႈၵႂႃႇဢဝ်လူတ်ႉၵႃး မႅၵ်ႊၶြူဝ်ႊ လၢၵ်ႈၸၼ်ၶိုၼ်ႈၵႂႃႇဝႆႉ။ လၢမ်းဝႃႈ ၶိူင်ႈၵွင်ႈလူင်ၼႆႉ ပေႃးယိုဝ်းတေထိုင် လွႆတႆးလႅင်း- ဝႃႈၼႆ။

sourcehttp ://www.panglong.org