ၽိုၼ်ၶၢဝ်ႇ “ပၢင်လူင်” မၢႆၼိုင်ႈဢိတ်ႇဢွၵ်ႇ ပိုၼ်ၽႄႈၼႂ်းမိူင်း

Friday, 13 December 2013 15:44 ပၢင်လူင်

ၽိုၼ်ၶၢဝ်ႇ “ပၢင်လူင်” ၾၢႆႇတႆး၊ သျၢၼ်းတၢၼ်ႇ တေႃႇသျိၼ်ႉ ၾၢႆႇမၢၼ်ႈ၊ ဢၼ်ဝႆႉၼၵ်းၶၵ်ႉၵၢၼ်လွင်ႈ ငမ်းယဵၼ် ဢိတ်ႇဢွၵ်ႇပိုၼ်ၽႄႈ ၼႂ်းမိူင်း ၸိုင်ႈတႆး။

လိၵ်ႈၽိုၼ်ၶၢဝ်ႇပၢင်လူင် Photo: Kor Kham

သိုၵ်းမၢၼ်ႈသွၵ်ႈတဝ်ႁႃသိုၵ်းတႆး ပဵၼ်ပၢင်တိုၵ်းပွတ်းႁူဝ်ၼမ်ႉပွၼ်

Wednesday, 27 November 2013 20:08 ပၢင်လူင်

ၾၢႆႇသိုၵ်းတႆးမီးၵႂၢမ်းသင်ႇ ၶတ်းၸႂ်ငိူင်ႉဝႄႈယႃႇႁႂ်ႈပဵၼ် ပၢင်တိုၵ်း၊ ၵူၺ်းၵႃႈ သိုၵ်းမၢၼ်ႈၸွမ်းသွၵ်ႈတဝ်ၶႆႈႁႃ သိုၵ်းတႆး တိၵ်းတိၵ်းသေ ပဵၼ်ပၢင်တိုၵ်းၵၼ်ပွတ်းႁူဝ် ၼမ်ႉပွၼ် တၢင်းမိူင်းၵိုင်။

တပ်ႉသိုၵ်းၸိုင်ႈတႆး RCSS/SSA

မေႃႁွင်ႉၵႂၢမ်းၸၢႆးသၢႆမၢဝ်း တေမႃးမူၼ်ႈၸႂ်ပွႆးပီမႂ်ႇတႆးၵဵင်းမႆႇ

Tuesday, 19 November 2013 19:47 ပၢင်လူင်

ပၢင်ပွႆးႁပ်ႉတွၼ်ႈပီမႂ်ႇတႆး 2108 ၼီႈ၊ သူင်ႇသင်ပီၵဝ်ႇ 2107 ၼီႈ ဢၼ်ပီႈၼွင်ႉတႆးၼႂ်းၵဵင်းမႆႇ တေၸတ်းတီႈ ဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇပီၼႆႉ တေမီးမေႃႁွင်ႉၵႂၢမ်းၸိုဝ်ႈယႂ်ႇၵိုၵ်းပိုၼ်း ၸၢႆးသၢႆမၢဝ်း မႃးႁွင်ႉၽဵင်းၵႂၢမ်း လဝ်ႇမူၼ်ႈတူၼ်ႈၸႂ်။

ႁၢင်ႈၽူဝ်ႊသတိူဝ်ႊမေႃႁွင်ႉၽဵင်းၵႂၢမ်းၸိုဝ်ႈယႂ်ႇ ၸၢႆးသၢႆမၢဝ်း ဢၼ်တေမႃးႁွင်ႉၽဵင်းၵႂၢမ်းတီႈ ပွႆးပီမႂ်ႇတႆးၵဵင်းမႆႇ မိူင်းထႆး

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၸၢႆးသႅင်ယ မွၵ်ႇလၢတ်ႈဝႃႈ- ပွႆးပီမႂ်ႇတႆးပီၼႆႉ ၼွၵ်ႈၼိူဝ်သေ ပၢင်ယုၵ်ႉယွင်ႈၸဝ်ႈၶူးမေႃ လႄႈ ႁပ်ႉတွၼ်ႈပီမႂ်ႇတႆးယဝ်ႉ တေမီးပႃးပၢင်ယုၵ်ႉယွင်ႈၸဝ်ႈ ပၢႆးမွၼ်းတႆး။ ၼႂ်းၼႆႉ မီးၸဝ်ႈပၢႆး မွၼ်းတႆးၸုပ်ႈသႅၼ်းပၢၼ်ၽဵင်းၵႂၢမ်းႁုၼ်ႈမႂ်ႇ ဢၼ်ၵိုၵ်းပိုၼ်းတႆးမႃး တင်ႈတႄႇႁူဝ်ႁႅၵ်ႈႁူဝ်တီးမႃးႁၢၼ်ႉတေႃႇဝၼ်းမိူဝ်ႈၼႆႉၼၼ်ႉ မီးၸၢႆးသၢႆမၢဝ်း၊ မေႃတႅမ်ႈၵႂၢမ်းလူင် ၻွၵ်းတိူဝ်ႊၸၢႆးၶမ်းလဵၵ်း၊ မေႃႁွင်ႉၵႂၢမ်းလူင်ၸၢႆးထီးသႅင် ၵေႃႉဢၼ်လုသဵင်ႈသုတ်းမုၼ် ၵႂႃႇၸိူဝ်းၼႆႉ။

ၵူၺ်းၵႃႈ တွၵ်းတိူဝ်ႊၸၢႆးၶမ်းလဵၵ်းတႄႉ ၵွပ်ႈဝႃႈမီးလၢႆတီႈလႆႈဝွၵ်ႇၸိူၼ်းဝႆႉလႄႈ တေပဵၼ်မႃးဢမ်ႇပဵၼ်မႃး တီႈၵဵင်းမႆႇ ပႆႇႁူႉ။ ဢၼ်တေမႃးၼႄႉၼွၼ်းတႄႉ ပဵၼ်မေႃႁွင်ႉၵႂၢမ်းလူင်ၸၢႆးသၢႆမၢဝ်း။ ၵွပ်ႈၼၼ် ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢိၵ်ႇတင်း ဝူင်းၵၢၼ်ပၢႆးမွၼ်း ႁဝ်းၶႃႈဢမ်ႇလိုမ်းၵုၼ်းမုၼ်ၶဝ်ၸဝ်ႈ ဢၼ်ၶဝ်လႆႈတႅမ်ႈ/ ႁွင်ႉၽဵင်းၵႂၢမ်းမႃး ပုၼ်ႈတႃႇ ၵူၼ်းတင်းၼမ်တင်းလၢႆ၊ ပိူဝ်ႈတႃႇၸိူဝ်ႉၸၢတ်ႈႁဝ်းလႄႈ ႁဝ်းၶႃႈၵေႃႈဢဝ်တိုဝ်ႉတၢင်း ဝၼ်းပီမႂ်ႇတႆးပီၼႆႉသေ လႆႈၸတ်းပၢင်ယွင်ႈယေႃး ၸၢႆးသၢႆမၢဝ်း - ဝႃႈၼႆ။

ဝၼ်းပီမႂ်ႇတႆး ပီၵၢပ်သီင (ပီမႃႉ) 2108 ၼီႈ၊ လိူၼ်ၸဵင်မႂ်ႇဝၼ်းၼိုင်ႈ ဢၼ်တေမႃးထိုင်ၼႆႉ တူၵ်းမႅၼ်ႈဝၼ်းတီႈ 03/12/13 ။  ၵွပ်ႈၼၼ် ပၢင်လဝ်ႇမူၼ်ႈတူၼ်ႈၸႂ် ဢၼ်ၸၢႆးသၢႆမၢဝ်းတေႁွင်ႉၵႂၢမ်းၼႆႉ တေမီးတင်ႈတႄႇၶမ်ႈဝၼ်းတီႈ 1 တေႃႇထိုင်ၶမ်ႈ ၶိုၼ်းဝၼ်းတီႈ 3 (ၶၢဝ်းတၢင်း 3 ၶိုၼ်း)။ ဝၼ်းတီႈ 1/112/2013 ပိုတ်ႇပၢင်ပွႆး၊ 2/12/2013 သူင်ႇသင်ႇပီၵဝ်ႇႁပ်ႉတွၼ်ႈပီမႂ်ႇ၊ လိုၼ်းသုတ်း ဝၼ်းတီႈ 3/12/2013 ဝၼ်းပီမႂ်ႇတႆးၼၼ်ႉ တွၼ်ႈပွတ်းၼႂ် လူႇတၢၼ်း ၶဝ်ႈမႂ်ႇၼမ်ႉမႂ်ႇ ၵႃရဝၵူၼ်းထဝ်ႈသေ လဵင်းၽဵလ်း (သွမ်းဝၼ်း) သင်ၶၸဝ်ႈလႄႈလဵင်ႉလူ ပီႈၼွင်ႉၶႅၵ်ႇၸိူဝ်းမႃးၶဝ်ႈႁူမ်ႈ ပၢင်လူႇတၢၼ်းဝၼ်းပီမႂ်ႇ။ ဝၢႆးၼၼ်ႉၵေႃႈ မီးပၢင်ယုၵ်ႉယွင်ႈ မေႃႁွင်ႉၽဵင်းၵႂၢမ်းၸိုဝ်ႈယႂ်ႇၵိုၵ်းပိုၼ်း ၸၢႆးသၢႆမၢဝ်း၊ ၵၢင်ၶမ်ႈၵေႃႈ တေမီးပၢင်မူၼ်ႈၸႂ်ဝၼ်းလူပ်းလိုၼ်း။

ပိူဝ်ႈတႃႇ ပဵၼ်မႃးပၢင်ပွႆးပီမႂ်ႇတႆးပီၼႆႉ ပူၼ်ႉမႃးမိူဝ်ႈဝၼ်းတီႈ 08/09/2013 ၵေႃလိၵ်ႈလၢႆးလႄႈၾိင်ႈငႄႈတႆး (ၵဵင်းမႆႇ) လႆႈၸတ်း ႁဵတ်းပၢင်ၵုမ် ႁွပ်ႈလိူၼ်ၶွင်ၵေႃလႄႈ လႆႈၶေႃႈတႅပ်းတတ်း ပိူဝ်ႈတႃႇၸတ်းပွႆးပီမႂ်ႇတႆး 2108 ဢၼ်ပဵၼ် ၾိင်ႈႁိတ်ႈႁွႆးၵိုၵ်း ပိုၼ်းတႆးမႃး။ ပိူင်လူင်မၼ်း ၾိင်ႈပီမႂ်ႇ၊ ၵၢၼ်လူႇတၢၼ်း ၶဝ်ႈမႂ်ႇၼမ်ႉမႂ်ႇ၊ ၵႃရဝလမ်ႁူဝ် (ၵၼ်တေႃး) ၵူၼ်းထဝ်ႈ၊ ပႂ်ႉၸဵင်၊ ပၢႆႈၸဵင်၊ ၵိၼ်ၸဵင်၊ လဵၼ်ႈၸဵင် ဢိၵ်ႇတင်း ၵႃရဝ ယုၵ်ႉယွင်ႈၸဝ်ႈၶူးမေႃတႆး ၶမ်ႈၶိုၼ်းဝၼ်းလိူၼ် 12 လပ်း ၸွမ်းၼင်ႇ ပူႇႁဵတ်းမႃး ယႃႈႁဵတ်း ဝႆႉ- ၼႆယဝ်ႉ။

sourcehttp//:www.panglong.org

ႁူဝ်သိူဝ်သူင်ႇလိၵ်ႈယိုၼ်ႈမိုဝ်း ႁူမ်ႈႁွမ်းသိူဝ်ၽိူၵ်ႇ

Monday, 18 November 2013 20:24 ပၢင်လူင်

ၵေႃၵပ်းသၢၼ်ၾၢႆႇဢုပ်ႇဢူဝ်း ပိူဝ်ႈတႃႇပႃႊတီႊတႆး 2 ပႃႊတီႊႁူမ်ႈႁွမ်းၵၼ် ၶွင်ပႃႊတီႊႁူဝ်သိူဝ် (SNLD) ဢၼ် ၸၢႆးၸေႃးဢွင်ႇပဵၼ်ႁူဝ်ၼႃႈ သူင်ႇလိၵ်ႈထိုင်ယိုၼ်ႈမိုဝ်း ႁူမ်ႈႁွမ်းပႃႊတီႊသိူဝ်ၽိူၵ်ႇ (SNDP) ။

လုင်းၸၢႆးဢၢႆႈပဝ်း ႁူဝ်ပဝ်ႈပႃႊတီႊသိူဝ်ၽိူၵ်ႇ တင်း ၸဝ်ႈၶုၼ်ထုၼ်းဢူး ႁူဝ်ပဝ်ႈပႃႊတီႊႁူဝ်သိူဝ်

ၸၢႆးၸေႃးဢွင်ႇ လၢတ်ႈဝႃႈ- ပိူဝ်ႈတႃႇႁူမ်ႈႁွမ်းပႃႊတီႊသိူဝ်ၽိူၵ်ႇၼႆႉ ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ပိုတ်ႇၼႄၵၢင်ၸႂ်ႁဝ်း ပဵၼ်တၢင်းၵၢၼ်ယဝ်ႉ၊ ၵူၺ်းၵႃႈ သိူဝ်ၽိူၵ်ႇတေတုမ်ႉတွပ်ႇမႃးၸိူင်ႉႁိုဝ်၊ တေႁဵတ်းႁိုဝ်ၶိုင်ၵႂႃႇၼၼ်ႉ ႁဝ်းတေလႆႈဢုပ်ႇဢူဝ်းၵၼ် ထႅင်ႈၵွၼ်ႇ။ ႁဝ်းၶႃႈတႄႉ ႁၢင်ႈႁႅၼ်းတူဝ်ႈတၼ်းဝႆႉယဝ်ႉ၊ မိူဝ်ႈလဵဝ် ဢၼ်ပႃႊတီႊႁူဝ်သိူဝ် ႁဝ်းၶႃႈဢွၵ်ႇလိၵ်ႈယိုၼ်ႈၸူးၼႆႉ သူင်ႇၸူးလုမ်းႁူဝ်ပဝ်ႈသိူဝ်ၽိူၵ်ႇ တီႈဝဵင်းတူၼ်ႈတီးၵူၺ်းပႆႇပေႃး၊ သူင်ႇၸူးလုမ်း သိူဝ်ၽိူၵ်ႇၵူႈၸႄႈဝဵင်း-  ဝႃႈၼႆ။

ၵဵဝ်ႇၵပ်းလွင်ႈၼႆႉ ၸၢႆးဢၢႆႈပဝ်း ႁူဝ်ၼႃႈပႃႊတီႊသိူဝ်ၽိူၵ်ႇ (SNDP) ၵေႃႈဝႃႈ- ပိူဝ်ႈတႃႇႁူမ်ႈႁွမ်းပႃႊတီႊႁူဝ်သိူဝ်ၼၼ်ႉ ႁဝ်းၵေႃႈ ၶွတ်ႇၽွတ်ႈဝႆႉၶွမ်ႊမတီႊဝႆႉၸဵမ်မိူဝ်ႈပၢင်ၵုမ်လူင် ဢၼ်ၸတ်းယဝ်ႉတူဝ်ႈၵႂႃႇ မိူဝ်ႈဝၼ်းတီႈ 04/01/13 တီႈဝဵင်းတႃႈၶီႈလဵၵ်း။ ၸၢႆးသွင်သီႇပဵၼ်ႁူဝ်ပဝ်ႈသေ မီးၽူႈၶဝ်ႈၶွမ်ႊမတီႊ 5 ၵေႃႉ။ ႁဝ်းၵေႃႈမီးၸႂ်ပိူဝ်ႈတႃႇတေႁူမ်ႈၵၼ်လႄႈ ၸင်ႇၶွတ်ႇၽွတ်ႈ ၶွမ်ႊမတီႊဝႆႉ။ ၵူၺ်းၵႃႈ မိူဝ်ႈလဵဝ်ၵၢၼ်ၼမ်ပူၼ်ႉတီႈလႄႈ မီးၵၢၼ်ဢၼ်ႁၢင်ႈႁႅၼ်းဝႆႉလၢႆၾၢႆႇ။ ပေႃးဝႃႈ ဝၢႆးႁဝ်းႁဵတ်းပၢင်ၵုမ်လူင် (Conference) ၼႂ်းလိူၼ်ၵျႅၼ်ႊၼိဝ်ႊရီႊ (2014) တီႈမူႇၸႄႈယဝ်ႉတူဝ်ႈယဝ်ႉတႄႉ ပိူဝ်ႈတႃႇ ႁူမ်ႈႁွမ်းႁူဝ်သိူဝ်ၼႆႉ ႁဝ်းၸင်ႇႁၢင်ႈႁႅၼ်းၵႂႃႇပဵၼ်တၢင်းၵၢၼ်- ဝႃႈၼႆ။

ၶွမ်ႊမတီႊပိူဝ်ႈတႃႇႁဵတ်းၵၢၼ်ႁႂ်ႈပႃႊတီႊတႆးႁူမ်ႈႁွမ်းၵၼ် ၶွင်ပႃႊတီႊသိူဝ်ၽိူၵ်ႇ (SNDP) ၶွတ်ႇၽွတ်ႈဝႆႉ မိူဝ်ႈပၢင်ၵုမ်လူင်သိူဝ်ၽိူၵ်ႇ တီႈတႃႈၶီႈလဵၵ်း ၽွင်းႁူဝ်ပီ 2013 မီးၵူၼ်းၶဝ်ႈၶွမ်ႊမတီႊ 5 ၵေႃႉ။ ၼႂ်း 5 ၵေႃႉၼၼ်ႉ ႁူဝ်ပဝ်ႈ 1. ၸၢႆးသွင်သီႇ (ႁူဝ်ပဝ်ႈ)။ 2.ၸၢႆးမွင်ႇတိၼ်ႇ (ၽွင်းတႅၼ်းၵူၼ်းမိူင်းလၢႆးၶႃႈ)။ 3.ၸဝ်ႈယုမ်းပႅင်ႇ (ၽူႈၶဝ်ႈၵေႃငဝ်ႈငုၼ်း သိူဝ်ၽိူၵ်ႇ)။ 4.ၸၢႆးပၢင်ႇ (ၽွင်းတႅၼ်း ၸႄႈမိူင်း မိူင်းၵိုင်)။ 5.ဢူးၵျေႃႇၸေႃးတၢၼ်း (ၽွင်းတႅၼ်းသၽႃးၸိူဝ်ႉၶိူဝ်း) ၸိူဝ်းၼႆႉ။

လိၵ်ႈယိုၼ်ႈၸူးၶွင်ပႃႊတီႊႁူဝ်သိူဝ် ဝၼ်းတီႈ 16/11/13 သႂ်ႇၸိုဝ်ႈဝႃႈ ထိုင်ႁူဝ်ပဝ်ႈငဝ်ႈလုမ်းၻီႊမွၵ်းၶရႅတ်ႊတိၵ်ႊ ပႃႊတီႊၸၢဝ်း ၶိူဝ်းတႆး (SNDP) ဝဵင်းတူၼ်ႈတီး။ လွင်ႈတၢင်းယိုၼ်ႈမိုဝ်း တႃႇပႃႊတီႊႁူဝ်သိူဝ် (SNLD) လႄႈပႃႊတီႊ သိူဝ်ၽိူၵ်ႇ (SNDP) တေသၢၼ်မိုဝ်းႁူမ်ႈၵၼ်။

1.ပိူဝ်ႈတႃႇပႃႊတီႊႁူဝ်သိူဝ် (SNLD) တင်းပႃႊတီႊသိူဝ်ၽိူၵ်ႇ (SNDP) တေႁူမ်ႈႁွမ်းၵၼ်ၼႆႉ ပူၼ်ႉမႃးမိူဝ်ႈဝၼ်းတီႈ 25/11/12  ပေႃႈမႄႈၵူၼ်းမိူင်းတၢင်းၼမ်ႉၸၢင် ယၢမ်ႈတုၵ်းယွၼ်းဝႆႉ။ ၼွၵ်ႈသေၼၼ်ႉ ၵူၼ်းမိူင်းပွတ်းသီႇပေႃႉ/ ၵျွၵ်ႉမႄး/မိူင်းယႆလႄႈ တင်းသင်ၶၸဝ်ႈ ဢိၵ်ႇလုၵ်ႈၸုမ်းၶွင်သွင်ပႃႊတီႊၵေႃႈ ယၢမ်ႈတႅမ်ႈလိၵ်ႈတုၵ်းယွၼ်းဝႆႉမိူဝ်ႈဝၼ်း တီႈ 14/10/2013 ။

2.ဢိင်ၼိူဝ် ၵေႃႁူမ်ႈသၢင်ႈၸိုင်ႈတႆး (SSJAC) မီးၵၢင်ၸႂ်ၼၼ်ႉၵေႃႈလီ၊ ဢိင်ၼိူဝ်ပၢင်ၵုမ်ၵေႃႇသၢင်ႈ လွင်ႈငမ်းယဵၼ် ဢၼ်ၸတ်းႁဵတ်းမိူဝ်ႈ 26-28/11/2012 တီႈဝဵင်းတႃႈၵုင်ႈၵေႃႈလီ၊ ၵၢင်ၸႂ်ၵူၼ်းမိူင်း 97% ႁၼ်လီၵမ်ႉထႅမ်တုၵ်းယွၼ်း ႁႂ်ႈပႃႊတီႊ 2 ဢၼ်ႁူမ်ႈၵၼ်။

3.မိူဝ်ႈဝၼ်း ပႃႊတီႊႁူဝ်သိူဝ်ၶွပ်ႈၶူပ်ႇတဵမ် 25 ပီ၊ ၸတ်းပၢင်ၶုၵ်းထူပ်း ပီၵွၼ်းငိုၼ်း ဢၼ်ၸတ်းႁဵတ်းပၢင်ၵႅဝ်ႈ တီႈဝဵင်းလႃႈသဵဝ်ႈ ၼၼ်ႉ လုၵ်ႈၸုမ်းပႃႊတီႊႁူဝ်သိူဝ်လၢႆၾၢႆႇၸိူဝ်းမႃးၶဝ်ႈပၢင်ၵႅဝ်ႈၵမ်ႈၼမ်ၵေႃႈ မီးၵၢင်ၸႂ်တုၵ်းယွၼ်းႁႂ်ႈပႃႊတီႊႁူဝ်သိူဝ် (SNLD) တင်းပႃႊတီႊသိူဝ်ၽိူၵ်ႇ (SNDP) ႁူမ်ႈႁွမ်းၵၼ်လႄႈယၢမ်းလဵဝ် ႁဝ်းၶႃႈၸင်ႇလႆႈယိုၼ်ႈမိုဝ်းမႃး ၼင်ႇၼႆ။

4.ၵွပ်ႈၼၼ် ပႃႊတီႊႁူဝ်သိူဝ် ၶွတ်ႇၽွတ်ႈဝႆႉမူႇၸုမ်းဢုပ်ႇဢူဝ်း 5 ၵေႃႉ။ [ၸၢႆးၸေႃးဢွင်ႇ (ၵႅမ်ႁူဝ်ပဝ်ႈ)၊ ၸၢႆးဢႅၵ်ႉၵ၊ ၸၢႆးၶမ်းပိူင်ႇၾႃႉ၊ ၸၢႆးသူၺ်ႇၵျူး၊ ၸၢႆးလႃႉဢွင်ႇ။]

5.သင်ၸိူဝ်ႉဝႃႈ ပႃႊတီႊသိူဝ်ၽိူၵ်ႇ (SNDP) ယိုၼ်ႈမိုဝ်းမႃးပိူဝ်ႈတႃႇဢုပ်ႇဢူဝ်းၵၼ်ၸိုင် ၶႂ်ႈဢုပ်ႇဢူဝ်းတီႈလႂ်/ မိူဝ်ႈလႂ်/ ၶၢဝ်းယၢမ်းလႂ်ၵေႃႈ တိတ်းတေႃႇၵပ်းသိုပ်ႇမႃးၸွမ်းၼင်ႇႁဵင်းလိၵ်ႈပႃႈတႂ်ႈၼႆႉသေၵမ်း။ (ႁဵင်းလိၵ်ႈ မၢႆ 26 သဵၼ်ႈတၢင်း ပျီႇ လႄႈ သဵၼ်ႈတၢင်းၸဝ်ႈၾႃႉ၊ ပွၵ်ႉ 5 ၊ ၸႄႈဝဵင်းမယၢၼ်းၵူင်း ဝဵင်းတႃႈၵုင်ႈ။)

sourcehttp//:www.panglong.org

ၸုမ်းၸၢဝ်းၶိူဝ်း တေႁဵတ်းပၢင်ၵုမ်ငဝ်ႈငုၼ်းယၢင်း ပိူဝ်ႈတႃႇႁၢင်ႈႁႅၼ်းဢုပ်ႇမၢၼ်ႈ

Friday, 15 November 2013 20:25 ပၢင်လူင်

ၸုမ်းၽူႈတႅၼ်းၸၢဝ်းၶိူဝ်း (NCCT) ဢၼ်ၶွတ်ႇၽွတ်ႈ မႃးမိူဝ်ႈပၢင်ၵုမ်လူင်ၽူႈၼမ်းၸုမ်းၸၢဝ်းၶိူဝ်း တီႈဝဵင်း လၢႆႇၸႃႇ မိူင်းၶၢင်၊ တေႁဵတ်းပၢင်ၵုမ် တီႈငဝ်ႈငုၼ်းယၢင်း (KNU) ပိူဝ်ႈတႃႇႁၢင်ႈႁႅၼ်းဢုပ်ႇဢူဝ်း လူင်ပွင်ၸိုင်ႈမၢၼ်ႈ တီႈဝဵင်းၽႃဢၢင်ႇ။

ပၢင်ၵုမ်ၽူႈၼမ်းၸုမ်းၸၢဝ်းၶိူဝ်းတီႈဝဵင်းလၢႆႇၸႃႇ Photo:irrawaddy

ဢိင်ၼိူဝ်တေမီးၵၢၼ်ဢုပ်ႇဢူဝ်း ၵဵဝ်ႇၵပ်းၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း ဝူင်ႈၵၢင် ၶွမ်ႊမတီႊၵပ်းသၢၼ်ၵၢၼ်ၵိုတ်းယိုဝ်းပတ်း ပိုၼ်ႉတင်းၸိုင်ႈမိူင်း (Nationwide Ceasefire Coordination Team-NCCT) တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် (UPWC) ၶွင်လူင်ပွင်ၸိုင်ႈတဵင်းၸဵင်ႇ တီႈဝဵင်းၽႃဢၢင်ႇ ၸႄႈမိူင်းယၢင်းၽိူၵ်ႇသေ ပေႃးထိုင်မႃးဝၼ်းတီႈ 15-17/12/13 ၸုမ်း NCCT တေႁဵတ်းပၢင်ၵုမ်ၵၼ်ထႅင်ႈ ငဝ်ႈငုၼ်းႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ။ မိူၼ်ၼင်ႇႁဵတ်း ပၢင်ၵုမ်လူင် တီႈလၢႆႇၸႃႇသေ ဢုပ်ႇမၢၼ်ႈ တီႈဝဵင်းမျိတ်ႉၵျီးၼႃး။

ပၢင်ၵုမ်လူင် (Conference) ၸုမ်းၸၢဝ်းၶိူဝ်း NCCT ၼႆႉ တေၸတ်းတီႈငဝ်ႈငုၼ်း KNU တီႈတေးပေႇထ ၸႄႈဝဵင်းလၢႆးပွႆး ၸႄႈမိူင်းယၢင်းၽိူၵ်ႇ တင်ႈတႄႇဝၼ်းတီႈ 15 တေႃႇထိုင် 17 ၊ ပေႃးယဝ်ႉဝၼ်းတီႈ 18 တေၵႂႃႇ ၽႃဢၢင်ႇ၊ ဝၼ်းတီႈ 19-20 တေႁူပ်ႉၵၼ်တင်းၸုမ်း UPWC ၊ ပိူဝ်ႈတႃႇဢုပ်ႇဢူဝ်းၵၼ် လွင်ႈၵိုတ်းယိုဝ်း ပတ်းပိုၼ်ႉ- ၽူႈယႂ်ႇၵူၼ်းလူင်ၼႂ်းၶွင်ႊသီႊ ႁူမ်ႈတုမ်ၵူႈၸၢဝ်းၶိူဝ်း (UNFC) ၸဝ်ႈၼိုင်ႈလၢတ်ႈၼင်ႇၼႆ။

ပိူဝ်ႈတႃႇၵေႃႇသၢင်ႈလွင်ႈငမ်းယဵၼ်ၼႆသေ ၶေႃႈလႆႈၸႂ်ဢၼ်လႆႈမႃးတီႈလၢႆႇၸႃႇၼၼ်ႉ တေသိုပ်ႇဢုပ်ႇဢူဝ်းၵၼ်ထႅင်ႈတီႈပၢင်ၵုမ် လူင်ၸၢဝ်းၶိူဝ်း ငဝ်ႈငုၼ်း KNU ထႅင်ႈသေ ႁဵတ်းသၢင်ႈၵၢၼ်ငၢၼ်းၵႂႃႇ။ ပၢင်ၵုမ်လူင်ၼႆႉ ပိူဝ်ႈတႃႇႁဝ်းၶႃႈတေၵေႃႇသၢင်ႈ လွင်ႈၽွမ်ႉႁူမ်ႈၵၼ်ပၼ်ႈၵႅၼ်ႇၼႅၼ်ႈၼႃ၊ ပိူဝ်ႈတႃႇလႆႈ ၶေႃႈလႆႈၸႂ် ဢၼ်တေ ၵႂႃႇဢုပ်ႇဢူဝ်းလူင်ပွင်ၸိုင်ႈမၢၼ်ႈတီႈၽႃဢၢင်ႇ- ၵႅမ်ၽူႈၼမ်းၼႂ်းၵူႈလွင်ႈလွင်ႈ UNFC ၸဝ်ႈသိုၵ်းလူင် ၶုၼ်ဢူၵ်ႉၵႃႇလၢတ်ႈ။

ပူၼ်ႉမႃးမိူဝ်ႈဝၼ်းတီႈ 30-31/10/13 တေႃႇထိုင်ဝၼ်းတီႈ 01/11/13 ပဵၼ်ပၢင်ၵုမ်လူင်ၽူႈၼမ်းၸုမ်းၸၢဝ်းၶိူဝ်းယိပ်းၵွင်ႈ ၵၢင်ႇလၢႆလၢႆၸုမ်း တီႈငဝ်ႈငုၼ်းတပ်ႉသိုၵ်းၶၢင်လွတ်ႈလွတ်း (KIA) တီႈဝဵင်းလၢႆႇၸႃႇ မိူင်းၶၢင်။ ၶွတ်ႇၽွတ်ႈလႆႈၶွမ်ႊမတီႊ ၵပ်းသၢၼ်ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (Nationwide Ceasefire Coordination Team-NCCT) ။

ထိုင်မႃးဝၼ်းတီႈ 4-5/11/13 ၊ ၸုမ်း NCCT  ႁူပ်ႉထူပ်းဢုပ်ႇဢူဝ်းၸုမ်း (UPWC) တီႈမျိတ်ႉၵျီးၼႃး။ ၵူၺ်းၵႃႈ ပၢင်ဢုပ်ႇဢူဝ်း ၼၼ်ႉ ႁဵၵ်ႈၸိုဝ်ႈဝႃႈ ပၢင်ဢုပ်ႇဢူဝ်းဝူင်ႈၵၢင်ၸုမ်းၶိုင်ပွင်လွင်ႈငမ်းယဵၼ်လႄႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း။ ၾၢႆႇလူင်ပွင်ၸိုင်ႈမီး ဢူးဢွင်ႇမိၼ်းဢွၼ်ႁူဝ်။ ၾၢႆႇၸၢဝ်းၶိူဝ်းမီးတူဝ်တႅၼ်း ၸုမ်းၸၢဝ်းၶိူဝ်း (NCCT) ။ မီးတူဝ်တႅၼ်းၽူႈၼမ်းၼႂ်း ၸၢတ်ႈၸိုင်ႈ ၽွမ်ႉႁူမ်ႈ (UN) မီႊသတိူဝ်ႊ ဝီႊၵျေႊၼမ်ႊၿီႊယိူဝ်ႊ တင်းတူဝ်တႅၼ်းမိူင်းၶႄႇ ၵဵဝ်ႇၵပ်းၵၢၼ်ငၢၼ်းၼႂ်းၵုၼ်ဢေႊသျိူဝ်ႊ ဝင်ႉယိၼ်ႇၾၼ်း ၸိူဝ်းၼႆႉၶဝ်ႈႁူမ်ႈလဵပ်ႈႁဵၼ်း- ၼႆယဝ်ႉ။

Sourcehttp//:www.panglong.org