သိုၵ်းမၢၼ်ႈသွၵ်ႈတဝ်ႁႃသိုၵ်းတႆး ပဵၼ်ပၢင်တိုၵ်းပွတ်းႁူဝ်ၼမ်ႉပွၼ်

Wednesday, 27 November 2013 20:08 ပၢင်လူင်

ၾၢႆႇသိုၵ်းတႆးမီးၵႂၢမ်းသင်ႇ ၶတ်းၸႂ်ငိူင်ႉဝႄႈယႃႇႁႂ်ႈပဵၼ် ပၢင်တိုၵ်း၊ ၵူၺ်းၵႃႈ သိုၵ်းမၢၼ်ႈၸွမ်းသွၵ်ႈတဝ်ၶႆႈႁႃ သိုၵ်းတႆး တိၵ်းတိၵ်းသေ ပဵၼ်ပၢင်တိုၵ်းၵၼ်ပွတ်းႁူဝ် ၼမ်ႉပွၼ် တၢင်းမိူင်းၵိုင်။

တပ်ႉသိုၵ်းၸိုင်ႈတႆး RCSS/SSA

မိူဝ်ႈဝၼ်းတီႈ 25-26/11/13 သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် ပွတ်းႁူဝ်ၼမ်ႉပွၼ် ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။ ၾၢႆႇသိုၵ်းမၢၼ်ႈတၢႆဝၢတ်ႇၽွင်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉငဝ်ႈငုၼ်းလွႆတႆးလႅင်းၵေႃႉၼိုင်ႈလၢတ်ႈဝႃႈ- ၾၢႆႇ RCSS/SSA မီးၶေႃႈသင်ႇပူင်လူင်းဝႆႉ ၼိူဝ်ၵူႈတပ်ႉဝႃႈ ငိူင်ႉဝႄႈလႆႈၵႃႈႁိုဝ်ၵေႃႈႁႂ်ႈငိူင်ႉဝႄႈ ဝႃႈၼႆသေတႃႉ ၾၢႆႇသိုၵ်းမၢၼ်ႈသမ်ႉ ယိင်ႈသိုၵ်းတႆးငိူင်ႉဝႄႈ ယိင်ႈၶဝ်ၸွမ်းလိုပ်ႈလမ်းလေႃႇတိုၵ်းသိုၵ်းတႆးတိၵ်းတိၵ်းလႄႈ လႆႈပဵၼ်ပၢင်တိုၵ်းၵၼ်။ ဢၼ်ပဵၼ်ပၢင်တိုၵ်းၵၼ်တင်း သိုၵ်းတႆး ၵမ်းၼႆႉ ပဵၼ်သိုၵ်းမၢၼ်ႈတပ်ႉၶလယ 94, 33  တင်းၶမယ 510 ။

ၾၢႆႇသိုၵ်းမၢၼ်ႈၼႆႉ လႅပ်ႈလႆႈႁပ်ႉၶေႃႈသင်ႇတၢင်းၼိူဝ်ဝႆႉ။ ပေႃးထွမ်ႇတူၺ်းသဵင်ၶဝ်ၸိူဝ်းဢွၵ်ႇၼႃႈသိုၵ်းၼႆႉ ပေႃးဢမ်ႇ ႁဵတ်းပၢင်တိုၵ်းဢမ်ႇလႆႈ ဢမ်ႇပၼ်ပွၵ်ႈမိူဝ်းၶိုၼ်း၊ ႁႂ်ႈၸွမ်းလၢင်ႉသုမ်ႉ/ ပၢင်သဝ်းၶွင်ၸုမ်းယိပ်းၵွင်ႈၵၢင်ႇ။ ၵူၺ်းၵႃႈ ပေႃးပဵၼ်ပၢင်တိုၵ်းသေလႆႈပၢႆႈလႆႈထွၼ်ထွႆသိုၵ်းၸိူဝ်းၼႆႉ သမ်ႉၺႃးတူတ်ႈတၢမ်ႇ၊ ပေႃးဝႃႈသုမ်းၵွင်ႈၵေႃႈ ၺႃးတူတ်ႈ တၢမ်ႇ၊ ၵွပ်ႈၼၼ်လႄႈ သိုၵ်းဢွၼ်ႇၵမ်ႈၽွင်ႈၵေႃႈပႃးၵၼ်လၵ်ႉပၢႆႈဢွၵ်ႇတပ်ႉ- ၽူႈမီးၸၼ်ႉငဝ်ႈငုၼ်းလွႆတႆးလႅင်း သိုပ်ႇလၢတ်ႈ ၼင်ႇၼႆ။

ၵဵဝ်ႇၵပ်းပၢင်တိုၵ်းပွတ်းႁူဝ်ၼမ်ႉပွၼ်ၼႆႉ ၶၢဝ်ႇတႆးလွတ်ႈလႅဝ်းဢွၵ်ႇဝႃႈ- ၾၢႆႇသိုၵ်းမၢၼ်ႈသွၵ်ႈတဝ်ႁႃ သိုၵ်းတႆးသေ ယူႇၾၢႆႇတူၵ်းၼမ်ႉပွၼ်ယိုဝ်းသႂ်ႇသိုၵ်းတႆး ၽွင်းတိုၵ်ႉလိုဝ်ႈတေႁုင်ၵိၼ်ၶဝ်ႈဝၼ်း တီႈၾၢႆႇဢွၵ်ႇၼမ်ႉပွၼ်၊ ယၢၼ်ႁိမ်းၼႃး ဝဵင်းမွၵ်ႈ 1 ၵီႊလူဝ်ႊ။ ၾၢႆႇသိုၵ်းတႆးယိုဝ်းတွပ်ႇၶိုၼ်းသေပဵၼ်ပၢင်တိုၵ်း၊ သိုၵ်းတႆးလွတ်ႈၽေး၊ သိုၵ်းမၢၼ်ႈဝၢတ်ႇၸဵပ်း လိူဝ်ႁႅင်းၵေႃႉၼိုင်ႈ။ ဝၢႆးၵိုတ်းယိုဝ်း ႁဵတ်းလွင်ႈငမ်းယဵၼ်မႃးၼႆႉ သိုၵ်းမၢၼ်ႈတင်းသိုၵ်းတႆး (RCSS/SSA) ပဵၼ်ပၢင်တိုၵ်းၵၼ် 143 ပွၵ်ႈ- ၼႆယဝ်ႉ။

Sourcehttp://wwwpanglong.org