ၽိုၼ်ၶၢဝ်ႇ “ပၢင်လူင်” ၾၢႆႇတႆး၊ သျၢၼ်းတၢၼ်ႇ တေႃႇသျိၼ်ႉ ၾၢႆႇမၢၼ်ႈ၊ ဢၼ်ဝႆႉၼၵ်းၶၵ်ႉၵၢၼ်လွင်ႈ ငမ်းယဵၼ် ဢိတ်ႇဢွၵ်ႇပိုၼ်ၽႄႈ ၼႂ်းမိူင်း ၸိုင်ႈတႆး။
လိၵ်ႈၽိုၼ်ၶၢဝ်ႇပၢင်လူင် Photo: Kor Kham
ၵဵဝ်ႇၵပ်းလွင်ႈၼႆႉ ၸၢႆးမင်းဢူ ၽူႈႁပ်ႉပုၼ်ႈၽွၼ်းႁဵတ်းဢွၵ်ႇလိၵ်ႈၽိုၼ်ၶၢဝ်ႇ (Journal) မွၵ်ႇလၢတ်ႈဝႃႈ- ႁဝ်းၶႃႈလႆႈဢိတ်ႇဢွၵ်ႇလိၵ်ႈပိုၼ်ၽၢဝ်ႇၽိုၼ်မၢႆၼိုင်ႈ မိူဝ်ႈဝၼ်းတီႈ 09/12/13 ၊ တင်းၼမ် 3,000 ၽိုၼ်၊ ႁူင်းၸၢၵ်ႈဢိတ်ႇလိၵ်ႈဢွင်ႇပၢၼ်းၽျူႇ ဝဵင်းတူၼ်ႈတီး ႁပ်ႉဢိတ်ႇပၼ်။ ႁဝ်းၶႃႈတေဢၢၼ်းပိုၼ်ၽႄႈ ၵူႈၸႄႈဝဵင်းၼႂ်းမိူင်းတႆး၊ ၼွၵ်ႈသေၼၼ်ႉ တေပိုၼ်ၽႄႈပႃးၸွမ်းလႅၼ်လိၼ်မိူင်းၶႄႇ/မိူင်းထႆး ၸိူဝ်းၼႆႉ။
ၼႂ်းလိၵ်ႈၽိုၼ်ၶၢဝ်ႇၼႆႉ ပိူင်လူင်မၼ်း လႆႈသႂ်ႇၶၵ်ႉၵၢၼ်လွင်ႈငမ်းယဵၼ်။ ၼွၵ်ႈသေၼၼ်ႉ မီးပႃးၵၢၼ်မိူင်း ၵၢၼ်သိုၵ်းလႄႈၵၢၼ်ၵူႈလွင်ႈလွင်ႈ၊ မီးလိၵ်ႈတႆး 10 ၼႃႈ၊ လိၵ်ႈမၢၼ်ႈ 10 ၼႃႈ ႁူမ်ႈတင်းမူတ်း 20 ၼႃႈ၊ ၼိုင်ႈၽိုၼ်တေတမ်းဝၢင်းၶၼ်ၶၢႆ 500 ပျႃး။ ဢဵၼ်းဢၢၼ်းဝႆႉ တေဢိတ်ႇဢွၵ်ႇပိုၼ်ၽႄႈၼိုင်ႈလိူၼ်ၼိုင်ႈပွၵ်ႈ ၼႆသေတႃႉၵေႃႈ တေပႂ်ႉတူၺ်းလွင်ႈတုမ်ႉတွပ်ႇတီႈၽူႈလူလိၵ်ႈၽိုၼ်ၶၢဝ်ႇႁဝ်းၶဝ်ၵွၼ်ႇ ဝၢႆးၼႆႉမႃးတေၸၢင်ႈမီး လွင်ႈလႅၵ်ႈလၢႆႈယူႇ၊ မိူၼ်ၼင်ႇၸၢင်ႈဢိတ်ႇဢွၵ်ႇ 1 လိူၼ်လႂ် 2 ပွၵ်ႈၵေႃႈပဵၼ်လႆႈ။ ၼွၵ်ႈသေၼၼ်ႉ တင်းၼမ်ၽိုၼ်ၶၢဝ်ႇၵေႃႈၸၢင်ႈဢိတ်ႇဢွၵ်ႇၼမ်မႃးထႅင်ႈ 4,000-5,000 ၽိုၼ်ၵေႃႈပဵၼ်လႆႈ- ၸၢႆးမင်းဢူ လၢတ်ႈၼင်ႇၼႆ။
သိုပ်ႇလၢတ်ႈဝႃႈ- ၽိုၼ်ၶၢဝ်ႇၼႆႉ ပဵၼ်ၽိုၼ်ဢွၼ်တၢင်းသုတ်းၵေႃႈၸႂ်ႈ၊ ၵွပ်ႈႁႅင်းၵူၼ်းၸိူဝ်းႁၢင်ႈႁႅၼ်းတိုၵ်ႉဢေႇ ဝႆႉလႄႈ လွင်ႈယူပ်ႈယွမ်းၵေႃႈတေမီး။ မိူၼ်ၼင်ႇၶၢဝ်ႇၵမ်းလိုၼ်းသုတ်း မိူၼ်ၼင်ႇၶၢဝ်ႇႁွၼ်ႉၶၢဝ်ႇမႆႈၸိူဝ်းၼႆႉ ဢမ်ႇလႆႈသႂ်ႇပႃး။ ပေႃးဝႃႈ ၽိုၼ်တေမႃး တေၶတ်းၸႂ်ႁဵတ်းဢွၵ်ႇႁႂ်ႈလီတီႈသုတ်းယူႇ- ဝႃႈၼႆ။
လိၵ်ႈၽိုၼ်ၶၢဝ်ႇ “ပၢင်လူင်” ၊ “သျၢၼ်းတၢၼ်ႇတေႃႇသျိၼ်ႉ” ၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ (SHAN) ဢိတ်ႇဢွၵ်ႇမႃးၽိုၼ်တီႈ 1 ။ မိူဝ်ႈလဵဝ် ၸုမ်းၶၢဝ်ႇၽူႈတွႆႇႁွၵ်ႈ တိုၵ်ႉၶတ်းၸႂ်ပိုတ်ႇလုမ်းတီႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်းယူႇ။ ထႅင်ႈၾၢႆႇၼိုင်ႈၵေႃႈ မိူဝ်ႈလဵဝ် လႆႈပိုတ်ႇပၼ်ပၢင်သွၼ် ပိုၼ်ႉထၢၼ်ၵၢၼ်ႁႃၶၢဝ်ႇ ဝႆႉတီႈဝဵင်းတူၼ်ႈတီး။
Sourcehttp//:www.panglong.org
No comments:
Post a Comment