ဢုပ်ႇဢူဝ်းၵၼ်လၢႆၵမ်း၊ လူင်းလၢႆးမိုဝ်းၵိုတ်းယိုဝ်း ႁဵတ်းလွင်ႈငမ်းယဵၼ်ယဝ်ႉၵေႃႈ သိုၵ်းမၢၼ်ႈယင်း တိုၵ်ႉတူင်ႉၼိုင်ထႅမ်ႁႅင်းသိုၵ်းႁႃယိုဝ်းသိုၵ်းတႆး SSPP/SSA သေ ပေႉၵိၼ်ၵူၼ်းဝၢၼ်ႈယူႇ။
ဝၼ်းတီႈ 10/07/13 တင်ႈတႄႇယၢမ်း 10:30-10:45 မူင်း၊ တပ်ႉသိုၵ်းၸိုင်ႈတႆး (SSPP/SSA) တပ်ႉၵွင် 816 ပဵၼ်ပၢင် တိုၵ်းၵၼ်တင်းသိုၵ်းမၢၼ်ႈတပ်ႉၵွင် 502 တီႈႁိမ်းဝၢၼ်ႈဢွႆဢၢၼ်၊ ဢိူင်ႇၵွင်းၶႃး ၸႄႈဝဵင်းမိူင်းၼွင်။ ၾၢႆႇသိုၵ်းတႆး SSA ဝၢတ်ႇၸဵပ်း 3 ၵေႃႉ။ ၾၢႆႇသိုၵ်းမၢၼ်ႈ တၢႆထင်တီႈၼႂ်းပၢင်တိုၵ်း 3 ၵေႃႉ၊ ဝၢတ်ႇၸဵပ်း 4 ၵေႃႉ- ၼႆယဝ်ႉ။
လွင်ႈတၢင်း လႆႈပဵၼ်ပၢင်တိုၵ်းၼႆႉ ၾၢႆႇသိုၵ်းတႆးဢွၵ်ႇၵူတ်ႇထတ်းပိုၼ်ႉတီႈသေ ၽႃႇၺႃးၵၼ်တင်းသိုၵ်းမၢၼ်ႈ။ ပၢင်တိုၵ်း ပွၵ်ႈၼႆႉ ၾၢႆႇသိုၵ်းတႆး ၵႅမ်ႁူဝ်ထႅဝ် ႁူဝ်ႁၢၼ်ၸၢႆးလႃႉမွင်ႇ ဢွၼ်ႁူဝ်ႁႅင်းၵူၼ်း 5 ၵေႃႉ။ ၾၢႆႇသိုၵ်းမၢၼ်ႈတပ်ႉၵွင် 502 ၸဝ်ႈသိုၵ်းထုၼ်းထႅင်ႇဝိၼ်းဢွၼ်ႁူဝ်၊ ႁႅင်းၵူၼ်း 30 ၵေႃႉ။ ဝၢႆးပၢင်တိုၵ်းယဝ်ႉ သိုၵ်းမၢၼ်ႈၵႂႃႇၼႄးၵူၼ်းမိူင်းဝၢၼ်ႈၶုမ်ငိုၼ်း ဢမ်ႇပွင်ႇၶၢဝ်ႇပၼ် ၸင်ႇလႆႈပဵၼ်ပၢင်တိုၵ်း၊ သူတေလႆႈသၢႆႈတႅၼ်းၶိုၼ်း ၵွင်ႈၵၢင်ႇ 3 လဝ်း- ဝႃႈၼႆ။
ဝၢၼ်ႈဢွႆဢၢၼ် ဢိူင်ႇၵွင်းၶႃး ၸႄႈဝဵင်းမိူင်းၼွင်ၼႆႉ ပဵၼ်ၼႃႈလိၼ်ၽွင်းငမ်း ၸႄႈဝဵင်းမၢႆ 5 ၶွင် SSPP/SSA ၊ ပိုၼ်ႉတီႈတပ်ႉၸုမ်းမၢႆ 612 ဢၼ်ၸဝ်ႈႁၢၼ်ၸၢမ်ၶိူဝ်းပဵၼ်ၽူႈၵွၼ်းတပ်ႉၸုမ်း၊ တပ်ႉၵွင်မၢႆ 816 ပဵၼ်ပႃႈတႂ်ႈ တပ်ႉၸုမ်း 612 ။
ဝၼ်းတီႈ 10/07/13 ၵူၺ်းၼင်ႇၵဝ်ႇ၊ သိုၵ်းတႆး SSPP/SSA တပ်ႉၵွင် 725 (ပႃႈတႂ်ႈတပ်ႉၸုမ်း 27) တင်းသိုၵ်းမၢၼ်ႈ တပ်ႉ 149 (မိူင်းသူႈ) ပဵၼ်ပၢင်တိုၵ်းၵၼ်ထႅင်ႈ တီႈၵွင်းၾၢႆႇဢွၵ်ႇ ဝၢၼ်ႈၼမ်ႉမေႃႇသႅင် ၸႄႈဝဵင်းမိူင်းသူႈ။ ဝၢႆးပၢင် တိုၵ်းယဝ်ႉ သိုၵ်းတႆးလူင်းၵူတ်ႇထတ်းပိုၼ်ႉတီႈပၢင်တိုၵ်း၊ ၺႃးသိုၵ်းမၢၼ်ႈ တပ်ႉ 149 ပွႆႇသိုၵ်းမုတ်း မူၵ်းယိုဝ်း သိုၵ်းတႆးလႄႈပဵၼ်ပၢင်တိုၵ်းၵၼ်ထႅင်ႈ- ၼႆယဝ်ႉ။
တပ်ႉၸုမ်း 27 ၸဝ်ႈသိုၵ်းၸေႃးမိူင်း ပဵၼ်ၽူႈၵွၼ်းတပ်ႉၸုမ်း၊ တပ်ႉၵွင် 725 ၶုၼ်သိုၵ်းမွင်ႇပီး ပဵၼ်ၽူႈၵွၼ်းတပ်ႉၵွင်၊ ၼႂ်းတပ်ႉၸုမ်း 27 ။ ဢၼ်ယိုဝ်းၵၼ်တင်းသိုၵ်းမၢၼ်ႈပွၵ်ႈၼႆႉ ပဵၼ်ႁူဝ်သိုၵ်းလူင်ၸၢႆးဢွင်ႇဢွၼ်ႁူဝ် ၼႂ်းတပ်ႉၵွင် 725။
ဢိင်ၼိူဝ်သိုၵ်းမၢၼ်ႈ တင်းသိုၵ်းတႆးပဵၼ်ပၢင်တိုၵ်းၵၼ်သေ သိုၵ်းမၢၼ်ႈတပ်ႉၵွင် 150 (မိူင်းၸၢင်၊ ၾၢႆႇႁွင်ႇၵႃလိ) လုၵ်ႉပႃၶီး ဢၼ်မီးၾၢႆႇဢွၵ်ႇဝဵင်းမိူင်းသူႈ ၶိုၼ်ႈၵႂႃႇထႅမ်ႁႅင်းသိုၵ်းထႅင်ႈ၊ သိုၵ်းမၢၼ်ႈတပ်ႉ 150 သွၵ်ႈတဝ်ထိူၼ်ႇ ၶဝ်ႈၸူးတပ်ႉပၢင် သဝ်းသိုၵ်းတႆး ဢၼ်မီးတၢပ်ႈလွႆၶဵဝ်၊ တေႃႇၼႃႈၾင်ႇၶူင်းလႄႈ လႆႈပဵၼ်ပၢင်တိုၵ်းၵၼ်ထႅင်ႈ- ၼႆယဝ်ႉ။
ၽူႈမီးၸၼ်ႉငဝ်ႈငုၼ်းဝၢၼ်ႈႁႆး ၸဝ်ႈၼိုင်ႈလၢတ်ႈဝႃႈ- ႁဝ်းၶႃႈၼႆႉ ၶႂ်ႈဢဝ်လၢႆးငမ်းယဵၼ်ၵႄႈလိတ်ႈ၊ ၵူၺ်းၵႃႈ သိုၵ်းမၢၼ်ႈ ၶဝ်ၵေႃႈဢမ်ႇလိူဝ်လႆႈၸၼ်ႉပႃႈၼိူဝ်လႄႈ ထႅမ်ႁႅင်းသိုၵ်းမႃးၽိုတ်ႉၶဝ်ႈၼႂ်းၼႃႈလိၼ်ႁဝ်းသေ လႆႈပဵၼ်ပၢင်တိုၵ်းၵၼ် ယူႇတိၵ်းတိၵ်း။ ၸူးၸႂ်ႁဝ်းၶႃႈတႄႉ ႁႂ်ႈပေႃးၵိုင်ႇလႅပ်ႈၸိုဝ်ႈဢၼ်ဝႃႈၵိုတ်းတိုၵ်း/ ၵိုတ်းယိုဝ်းၵၼ်၊ ႁႂ်ႈၵူၼ်းမိူင်းလႆႈၸၢမ်ႇ ပူၺ်ႈလွင်ႈငမ်းယဵၼ်ၼၼ်ႉ ဢမ်ႇၶႂ်ႈႁႂ်ႈပဵၼ်ပၢင်တိုၵ်းၵၼ်၊ မီးပၼ်ႁႃၸိူင်ႉႁိုဝ်ၵေႃႈ ၶႂ်ႈဢဝ် လၢႆးငမ်းယဵၼ်ၵႄႈလိတ်ႈ။ ၵူၺ်းၵႃႈ ဢမ်ႇၸၢင်ႈႁဵတ်းႁိုဝ်၊ ၾၢႆႇသိုၵ်းမၢၼ်ႈၶဝ်သမ်ႉ ဢဝ်လၢႆးႁၢႆႉမႃး ႁဝ်းၵေႃႈ ၵႃႈလႆႈဢဝ်လၢႆးႁၢႆႉတွပ်ႇၶိုၼ်း- ဝႃႈၼႆ။
Sourcehttp;//www.ponglong.org
No comments:
Post a Comment