ၸဝ်ႈၼႃး ဝၢၼ်ႈႁၢႆးလူင် တူၵ်းၵိၼ်း ယွၼ်ႉၼမ်ႉငႂ်ႈ ၶုတ်းၶမ်း

Details

 

Published Date

Written by သႅင်ႁႃႈၼမ်ႉ

ၸဝ်ႈႁႆႈၸဝ်ႈၼႃး တီႈဝၢၼ်ႈႁၢႆးလူင် မိူင်းလဵၼ်း တႃႈၶီႈလဵၵ်း ဢမ်ႇၸၢင်ႈႁဵတ်းၼႃး ယွၼ်ႉၼမ်ႉငႂ်ႈသၢၼ်ႊၶေႊမီႊ ၶုတ်းၶမ်း၊ ၵူၼ်းမိူင်းတုၵ်းယွၼ်းႁႂ်ႈ ၸဝ်ႈၼႃႈတီႈ ၵႄႈလိတ်ႈပၼ်ႁႃပၼ်လၢႆပွၵ်ႈ ဢမ်ႇမီးလွင်ႈလႅၵ်ႈလၢႆႈသင်။

မိူဝ်ႈဝၼ်းထိ 12/07/2013 ၼႆႉလႅင်ႇၶၢဝ်ႇၼႂ်းမိူင်း ပွင်ႇၶၢဝ်ႇမႃးဝႃႈ ၸဝ်ႈႁႆႈ ၸဝ်ႈၼႃးတီႈဝၢၼ်ႈႁၢႆးလူင်၊ မိူင်းလဵၼ်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဢမ်ႇၸၢင်ႈႁဵတ်းၼႃး ယွၼ်ႉၼမ်ႉငႂ်ႈသၢၼ်ႊၶေႊမီႊ ၶုတ်းၶမ်းၼႂ်း မႄႈၼမ်ႉၶမ်းလႄႈ မႄႈၼမ်ႉမူၺ်ၶၢင်ႉၸွမ်းလွၵ်းၼႃး ဢမ်ႇၸၢင်ႈၽုၵ်ႇၶဝ်ႈ၊ တူၼ်ႈၶဝ်ႈၸိူဝ်းသွမ်ႈၵေႃႈတၢႆၼႆယဝ်ႉ။

လႅင်ႇၶၢဝ်ႇလၢတ်ႈဝႃႈ “ ၶၢဝ်းၼႃႈၾူၼ်ၸိူင်ႉၼႆမိူင်းတႆးလၢႆလၢႆတီႈတႄႉ ၵမ်ႈၼမ်ဢွၼ်ၵၼ်ႁဵတ်းၼႃးပေႃးတေယဝ်ႉ တူဝ်ႈၵၼ်မူတ်းယဝ်ႉ ၵူၺ်းၵႃႈႁဝ်းၶႃႈတီႈထုင်ႉၼႃးႁၢႆးလူင်ၼႆႉ ဢမ်ႇၸၢင်ႈႁဵတ်းၼႃး ယွၼ်ႉၶွမ်ႊပၼီႊၶုတ်းၶမ်းၶဝ် ပွႆႇၼမ်ႉငႂ်ႈ သၢၼ်ႊၶေႊမီႊ လူင်းၸွမ်းမႄႈၼမ်ႉ၊ ၼမ်ႉၸိူဝ်းၼၼ်ႉသမ်ႉ ႁဝ်းၶႃႈဢဝ်လဵင်ႉၼႃးလႄႈ ႁဵတ်းႁႂ်ႈၼႃး ဢမ်ႇလီ တူၼ်ႈၶဝ်ႈတၢႆသေ ၸဝ်ႈႁႆႈၸဝ်ႈၼႃးတူၵ်းတၢင်းယၢပ်ႇမႃးမီးသၢမ်ပီယဝ်ႉ။ ယွၼ်ႉၼမ်ႉငႂ်ႈၸိူဝ်းၼႆႉသေ ယႃႇ ဝႃႈတူၼ်ႈၶဝ်ႈလႃႈ တူၼ်ႈမႆႉတူၼ်ႈတွၵ်ႇဢၼ်မီးၸွမ်း ၽင်ႇၼမ်ႉၼၼ်ႉၵေႃႈယၢမ်းလဵဝ်လႆႈတၢႆမူတ်းယဝ်ႉ တေႃႈ ၼင်ႇတူၼ်ႈမႆႉယႂ်ႇလူင်မွၵ်ႈၼၼ်ႉ ယင်းတၢႆလႆႈၼႆႉ တူၼ်ႈၶဝ်ႈလဵၵ်ႉလဵၵ်ႉဢွၼ်ႇၼၼ်ႉ တေႁဵတ်းၸိူင်ႉႁိုဝ် ၸၢင်ႈပဵၼ်တူၼ်ႈမႃးလႆႈ” ဝႃႈၼႆ။


လႅင်ႇၶၢဝ်ႇလၢတ်ႈထႅင်ႈဝႃႈ လွင်ႈၸိူဝ်းၼႆႉႁဝ်းၶႃႈယၢမ်ႈတႅမ်ႈလိၵ်ႈထိုင်တီႈ ၸဝ်ႈၼႃႈတီႈဢၼ်ၵဵဝ်ႇၶွင်ႈလၢႆလၢႆပွၵ်ႈ ယဝ်ႉ။ ၵူၺ်းၵႃႈတေႃႇထိုင်တေႃႈလဵဝ်  ယင်းပႆႇမီးလွင်ႈလႅၵ်ႈလၢႆႈသင်မႃး ဢမ်ႇၼၼ်ၵေႃႈလိၵ်ႈၼၼ်ႉဢမ်ႇလႆႈထိုင် ၼႂ်းမိုဝ်းၶဝ်ႁႃႉဢမ်ႇႁူႉၼႆယဝ်ႉ။

တႃႇတေတႅမ်ႈလိၵ်ႈၵႂႃႇတၢင်ႇထိုင်ၵူၼ်းလူင်ၼိုင်ႈၵမ်းၼၼ်ႉ ၵူၼ်းဝၢၼ်ႈၶဝ်လႆႈၵဵပ်းငိုၼ်းၵၼ် ဢဝ်ပဵၼ်ၵႃႈဢွၵ်ႇ တၢင်း၊ ငိုၼ်းၵေႃႈသဵင်ႈၼမ်၊ ၵႂႃႇမႃးလၢႆႈပွၵ်ႈယဝ်ႉ ဢမ်ႇႁၼ်မီးသင်လႅၵ်ႈလၢႆႈမႃး။ ၵႂႃႇမႃးၼိုင်ႈၵမ်းလႆႈၸႂ်ႉငိုၼ်းၼမ် ၵူၺ်းဢမ်ႇၵႃး မၢင်ၵမ်းမိူၼ်ဢဝ်ငိုၼ်းပႅတ်ႈတူၵ်းၼမ်ႉၵူၺ်း ဢမ်ႇႁၼ်ၽွၼ်းတုမ်ႉတွပ်ႇသင်မႃးၼႆယဝ်ႉ။

Sourcehttp;//www.youthpowermedia.org