သိုၵ်းမၢၼ်ႈထႅမ်ႁႅင်းသိုၵ်းတူင်ႉၼိုင် ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းမူႇၸႄႈ-ၼမ်ႉၶမ်း။ သမ်ႉမီးမၢၵ်ႇတႅၵ်ႇၼိူဝ်သဵၼ်ႈ တၢင်းလႄႈ တိၺွပ်းလူတ်ႉၵႃးၵူၼ်းမိူင်းၼမ်းၼႃႈ သူင်ႇတၢင်း/ ၸွမ်ႇၸိမ်ၸွမ်းထႅဝ်ၵႃးသိုၵ်း။
သိုၵ်းမၢၼ်ႈၼေႇပျီႇတေႃႇ
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ-သိုၵ်းမၢၼ်ႈထႅမ်ႁႅင်းသိုၵ်းမႃးပွတ်း ၸႄႈဝဵင်းမူႇၸႄႈ-ၼမ်ႉၶမ်း၊ ၶဝ်ၵိုတ်းလူတ်ႉၵႃးဝႆႉ တီႈႁိမ်းဝၢၼ်ႈၼွင်ၶၢၼ်သေ ႁႄႉလူတ်ႉၵူၼ်းမိူင်းၸိူဝ်းၵႃးၵူၼ်းမိူင်း ၸိူဝ်းၵႂႃႇတႃႈပႆတၢင်းၶဝ် လုၵ်ႉမူႇၸႄႈ လူင်းၼမ်ႉၶမ်း၊ ၸႂ်ႉလူတ်ႉၵႃးၵူၼ်းမိူင်း ၼမ်းၼႃႈၶဝ်ၵႂႃႇၽွင်ႈ၊ ဢဝ်ၸွမ်ႇၵႂႃႇၼႂ်းၵႄႈလူတ်ႉၵႃးသိုၵ်း၊ မိူၼ်ၼင်ႇ ပေႃးလူတ်ႉၵႃးသိုၵ်းယဝ်ႉၵႃး ၵူၼ်းမိူင်း၊ ပေႃးၵႃးၵူၼ်းမိူင်းယဝ်ႉၵႃးသိုၵ်းႁဵတ်းၼႆၵႂႃႇ တေႃႇထိုင်ပေႃးၽႅဝ်တီႈတၢင်းၶဝ်ႈ ဝဵင်းၼမ်ႉၶမ်း - ၸဝ်ႈၵႃးၵေႃႉၼိုင်ႈ ဢၼ်ထုၵ်ႇတိၺွပ်းၵႃးၵႂႃႇၸွမ်းထႅဝ်ၵႃးသိုၵ်းမၢၼ်ႈလၢတ်ႈၼင်ႇၼႆ။
ၼၢင်းဢေၶမ်း လုၵ်ႈႁဵၼ်းပၢၼ်မႂ်ႇၵေႃႉၼိုင်ႈလၢတ်ႈဝႃႈ- လွင်ႈသိုၵ်းမၢၼ်ႈႁွင်ႉလူတ်ႉၵႃး/ၵူၼ်းမိူင်းသေ ဢဝ်ႁဵတ်းၶိူင်ႈၵႅတ်ႇၶႄ ႁႄႉၵင်ႈၶဝ်ၵႂႃႇၶၢဝ်းတၢင်းၼႆႉ ဢမ်ႇထုၵ်ႇလီပဵၼ်။ သင်ၸိူဝ်ႉဝႃႈမီးပိူၼ်ႈၵၢင်မၢၵ်ႇဝႆႉၸိုင် မီးၵူၼ်းမိူင်း ၵူၺ်းတေတၢႆဢွၼ်တၢင်း။ လၢတ်ႈဝႃႈတပ်ႉသိုၵ်းမၢၼ်ႈၼႆႉ ပဵၼ်တႃႇၵႅတ်ႇၶႄႁႄႉၵင်ႈၵူၼ်းမိူင်း၊ ႁဵတ်းႁိုဝ်မိူဝ်ႈလဵဝ်သမ်ႉ ဢဝ်ၵူၼ်းမိူင်းမႃးပဵၼ်ၵူၼ်းၵႅတ်ႇ ၶႄႁႄႉၵင်ႈပၼ်တပ်ႉသိုၵ်း- ဝႃႈၼႆ။
ဝၢႆးသိုၵ်းမၢၼ်ႈၸႂ်ႉဢဵၼ်ႁႅင်းၶဝ်ႈတိုၵ်းယိုဝ်းယိုတ်းတပ်ႉ တပ်ႉသိုၵ်းၸိုင်ႈတႆး (RCSS/SSA) ၼႃႈလိၼ် 701 ပွတ်းထုင်ႉမၢဝ်းယဝ်ႉ တပ်ႉသိုၵ်းမၢၼ်ႈသူင်ႇဢဵၼ်ႁႅင်းၶိုၼ်ႈၵႂႃႇတူင်ႉၼိုင်ပွတ်းတွၼ်ႈၼၼ်ႉတင်းၼမ်။ မိူၼ်ၼင်ႇတီႈ တပ်ႉပၢင်သဝ်းမႂ်ႇသိုၵ်းမၢၼ်ႈ ၼိူဝ်ၵွင်းလွႆ ဢၼ်မီးၾၢႆႇၸဵင်ႇၸၢၼ်းဝၼ်းဢွၵ်ႇ ဝဵင်းၼမ်ႉၶမ်းၼၼ်ႉ ၶဝ်တေႃႉၸလိပ်ႈၶဝ်ႈတၢင်းၵိၼ်ၶိူင်ႈသိုၵ်းၶိုၼ်ႈ ၵႂႃႇတိၵ်းတိၵ်း။ ၸွမ်းတႃႈၼမ်ႉတႃႈႁိူဝ်း ၼမ်ႉမၢဝ်းၸိူဝ်းၼႆႉၵေႃႈ မႃးဝၢင်းဢဵၼ်ႁႅင်းသိုၵ်း တူင်ႉၼိုင်တင်းၼမ်တင်းလၢႆ- ၵူၼ်းၼႂ်းပိုၼ်ႉတီႈပွတ်းထုင်ႉမၢဝ်းၵေႃႉၼိုင်ႈၵေႃႈလၢတ်ႈၼင်ႇၼႆ။
Sourcehttp://www.panglong.org
No comments:
Post a Comment