ၽိုၼ်ယုၵ်းယၢင်ႇၵိုတ်းယိုဝ်း ပတ်းပိုၼ်ႉၸိုင်ႈမိူင်းဢွၵ်ႇမႃးယဝ်ႉ

Friday, 13 September 2013 15:31 ပၢင်လူင်

ၽိုၼ်ယုၵ်းယၢင်ႇ ၵိုတ်းယိုဝ်းပတ်းပိုၼ်ႉၸိုင်ႈမိူင်း မီးၵၢၼ်ဢုပ်ႇဢူဝ်းၵၼ်ၶဵၼ်ႇတႅမ်ႈဢွၵ်ႇမႃးယဝ်ႉ၊ တေမီးၵၢၼ်ၸႅၵ်ႇ ၸၢႆႇပၼ် ၼႂ်းလူင်ပွင်ၸိုင်ႈလႄႈ ၾၢႆႇႁူမ်ႇလူမ်ႈ တင်းၸုမ်းၸၢဝ်းၶိူဝ်းယိပ်းၵွင်ႈၵၢင်ႇ လၢႆလၢႆၸုမ်း။

ၸဝ်ႈယွတ်ႈသိုၵ်း ႁူဝ်ပဝ်ႈ RCSS/SSA

ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း လၢတ်ႈၼႄဝႃႈ- ၸုမ်းဢုပ်ႇဢူဝ်း (Technical Team) သုၼ်ၵၢင်လွင်ႈငမ်းယဵၼ်မၢၼ်ႈ (MPC) ၊ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ RCSS ဢုပ်ႇၵၼ် ဝၼ်းတီႈ 11-12/09/13 (ၶၢဝ်းတၢင်း 2 ဝၼ်း) သေ မိူဝ်ႈလဵဝ် ၽိုၼ်ယုၵ်းယၢင်ႇ ၵိုတ်းယိုဝ်းပတ်းပိုၼ်ႉၸိုင်ႈမိူင်း ၶဵၼ်ႇတႅမ်ႈဢွၵ်ႇမႃးယဝ်ႉ။ ၽိုၼ်ယုၵ်းယၢင်ႇမၼ်းၵေႃႈ လႆႈမႃးယဝ်ႉ၊ ၵူၺ်းၵႃႈ ၽိုၼ်တႄႉမၼ်းၼၼ်ႉ ပေႃးဝႃႈၸဝ်ႈသိုၵ်းလူင်ၸၢႆးလႃႉ တင်း ၸဝ်ႈသိုၵ်းၸၢႆးငိုၼ်း ၶိုၼ်းမႃးထိုင်ငဝ်ႈၸိုင်ႈၵွၼ်ႇ ၸင်ႇတေႁၼ်- ဝႃႈၼႆ။

ၸဝ်ႈယွတ်ႈသိုၵ်း သိုပ်ႇလၢတ်ႈဝႃႈ- ႁူဝ်ယွႆႈယႅမ်း/လွင်ႈတႅတ်းတေႃးပႆႇလႆႈႁူႉသေတႃႉ ဢၼ်တၢင်းၸုမ်းႁဵတ်းၵၢၼ် ပိူဝ်ႈတႃႇၵပ်းသၢၼ်ၼႂ်းၵႄႈၵၢင်ၸၢဝ်းၶိူဝ်း (WGEC) တၢင်ႇဝႆႉ 1.ပိူင်ၵိုတ်းယိုဝ်းပတ်းပိုၼ်ႉ တင်းမူတ်းမီး 14 ၶေႃႈၼၼ်ႉ လႆႈမူၼ်ႉမႄးၵႄႈလိတ်ႈၼမ်ႉၵႂၢမ်းမၼ်းၵမ်ႈၽွင်ႈ သေယွမ်းႁပ်ႉယဝ်ႉ။ 

2.ၶေႃႈတူၵ်းလူင်းၸၼ်ႉၸႄႈမိူင်း 14 ၽိုၼ်၊ ၸၼ်ႉၸိုင်ႈမိူင်းႁူမ်ႈတုမ် 19 ၽိုၼ်ၸိူဝ်းၼၼ်ႉ လူင်ပွင်ၸိုင်ႈလႆႈႁပ်ႉႁွင်း/မၵ်းမၼ်ႈမႃး တင်းမူတ်းမီး 33 ၽိုၼ်။

ဢိင်ၼိူဝ် ဢၼ်လႆႈမႃးၽိုၼ်ယုၵ်းယၢင်ႇၼႆႉ KNU, RCSS တေမီးၵၢၼ်ၸႅၵ်ႇၸၢႆႇပၼ်ၼႂ်း ၸုမ်းယိပ်းၵွင်ႈၵၢင်ႇ လၢႆၸုမ်းသေ ယွၼ်းတၢင်းႁၼ်ထိုင်/ထတ်းသၢင်ၵႂႃႇ၊ တေၸၢင်ႈမီးၽိုၼ်ယုၵ်းယၢင်ႇတီႈ 2 မႃးထႅင်ႈ။ တၢင်းၸုမ်း MPC ၵေႃႈ တေလႆႈၼႄပႃးၼႂ်းလူင်ပွင်ၸိုင်ႈ၊ ၼႂ်းၶွင်ႊသီႊၾၢႆႇၵႅတ်ႇၶႄလႄႈ ႁူမ်ႇလူမ်ႈၸိူဝ်ႉၸၢတ်ႈ (NDSC) ဢၼ်ၽူႈ တႅၼ်းၾၢႆႇသိုၵ်းမီးသဵင်ၼမ်။ ပေႃးယဝ်ႉ တေၸၢင်ႈမီး ၽိုၼ်ယုၵ်းယၢင်ႇတီႈ 2 ထႅင်ႈၼင်ႇၵဝ်ႇ- ဝႃႈၼႆ။

လူင်ပွင်ၸိုင်ႈမၢၼ်ႈ ယိူင်းဢၢၼ်းဝႆႉဝႃႈ ႁၢင်လိူၼ်ဢွၵ်ႊထူဝ်ႊၿိူဝ်ႊ 2013 ၼႆႉ ႁႂ်ႈလႆႈလူင်းလၢႆးမိုဝ်း ၵိုတ်းယိုဝ်းပတ်း ပိုၼ်ႉၸိုင်ႈမိူင်း။ တင်ႈတႄႇလိူၼ်ၼူဝ်ႊဝႅမ်ႊၿိူဝ်ႊ 2013 တေႃႇထိုင်လိူၼ်မၢတ်ႊၶျ် 2014 ႁႂ်ႈလႆႈဢုပ်ႇဢူဝ်းတူၵ်းလူင်း တၢင်းၵၢၼ်မိူင်း။ တင်ႈတႄႇလိူၼ်ဢေႊပရိူဝ်ႊလ် 2014 တေႃႇထိုင်လိူၼ်မၢတ်ႊၶျ် 2015 ႁႂ်ႈလႆႈဢုပ်ႇဢူဝ်းၸၼ်ႉ ၸိုင်ႈမိူင်းႁူမ်ႈတုမ် ႁိုဝ် ပၢင်ၵုမ်လူင်ပၢင်လူင်။

ၸဝ်ႈယွတ်ႈသိုၵ်း သိုပ်ႇလၢတ်ႈထႅင်ႈဝႃႈ- ၸွမ်းၼင်ႇၵဝ်ၶႃႈလႆႈငိၼ်း ဢၼ်ၸဝ်ႈသိုၵ်းလူင်ၸၢႆးလႃႉ တင်းၸဝ်ႈသိုၵ်း ၸၢႆးငိုၼ်း လၢတ်ႈမႃးတၢင်းၾူၼ်ႊၼၼ်ႉ ၶေႃႈဢၼ်ႁဝ်းထုၵ်ႇလႆႈပၼ်တၢင်းႁၼ်ထိုင်ၼႆႉ မၼ်းမီးထႅင်ႈတင်းၼမ်။ မီးတင်းၼမ်ၸိူင်ႉႁိုဝ် မၼ်းၸဝ်ႈဢမ်ႇသပ်းယွႆႈမႃးသေတႃႉ ၵူႈပွၵ်ႈယၢမ်ႈလၢတ်ႈဝႃႈ- ဢၼ်ႁဝ်းတူၵ်းလူင်းၵၼ်မႃးၼႆႉ ၸၼ်ႉၸႄႈမိူင်း 1 ၽိုၼ်၊ ၸၼ်ႉၸိုင်ႈမိူင်းႁူမ်ႈတုမ် 2 ၽိုၼ်။ ၼွၵ်ႈသေၼၼ်ႉ မီးထႅင်ႈပႃးတင်းဢၼ် တူၵ်းလူင်း ၵၼ်တင်း ၸုမ်းၽဵဝ်ႈမူၺ်ႉယႃႈမဝ်းၵမ်လႄႈရႃၸဝတ်ႈၸၢတ်ႈၸိုင်ႈ (UNODC) 1 ၽိုၼ်။ ဢၼ်တူၵ်းလူင်းမႃးတင်းမူတ်း ပေႃးပႃး UNODC မီးတင်းမူတ်း 40 ၶေႃႈ။ ပေႃးဢမ်ႇပႃး UNODC မီး 31 ၶေႃႈ၊ ၸိူဝ်းၼႆႉ တေႃႇထိုင်မိူဝ်ႈလဵဝ် ဢၼ်ၼႄၼမ်ႉၼႄတူဝ်လႆႈ မီး 2 ၶေႃႈၵူၺ်း- 1.ပိုတ်ႇလုမ်းၵပ်းသၢၼ်။ 2.လူင်းပိုၼ်ႉတီႈဢုပ်ႇဢူဝ်းၵူၼ်းမိူင်း/ ႁူပ်ႉထူပ်းဢုပ်ႇဢူဝ်းပႃႊတီႊၵၢၼ်မိူင်း/ ၸုမ်းတူင်ႇဝူင်းၵူၼ်း ၸိူဝ်းၼႆႉၵူၺ်း- ဝႃႈၼႆ။

Sourcehttp://www.panglong.org