တပ်ႉသိုၵ်းၸိုင်ႈတႆးတင်းသိုၵ်းမၢၼ်ႈ ပဵၼ်ပၢင်တိုၵ်းႁိမ်းလွႆလၢၼ်း

ဢိင်ၼိူဝ်သိုၵ်းတႆးတင်းသိုၵ်းမၢၼ်ႈ မီးလွင်ႈၶဵင်ႈၶႅင်ၵၢၼ် သိုၵ်းတေႃႇၵၼ် ပွတ်းလွႆလၢၼ်းသေ မိူဝ်ႈၼႆႉ ၵိူတ်ႇပဵၼ် ပၢင်တိုၵ်းၵၼ်။ မိူဝ်ႈဝႃးၵေႃႈၵူၼ်းဝၢၼ်ႈဝႃႈယိုဝ်းၵၼ်၊ ၵူၺ်းၵႃႈ ၽူႈၶၢၼ်ပၢၵ်ႇ SSPP/SSA ဝႃႈ သိုၵ်းမၢၼ်ႈၽႃႇ ၺႃးမၢၵ်ႇ။

တပ်ႉသိုၵ်းၸိုင်ႈတႆး SSPP/SSA တႅဝ်းၼႃႈ ၽွင်းပၢင်တိုၵ်းမိူဝ်ႈပူၼ်ႉမႃး

ဝၼ်းထိ 20/02/13 (မိူဝ်ႈၼႆႉ) တင်ႈတႄႇပွတ်းၼႂ်ယၢမ်း 10 မူင်းၶိုင်ႈတေႃႇထိုင်ယၢမ်းဝၼ်းတဵင်ႈ၊ သိုၵ်းမၢၼ်ႈ ၶလယ 33 (မိူင်းၵၢဝ်) တင်းသိုၵ်းမၢၼ်ႈၶမယ 322 (လၢဝ်ႇၵၢႆး) ပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆး (SSPP/SSA) တပ်ႉၸုမ်း 36 တီႈလွႆလၢၼ်း ႁိမ်းဝၢၼ်ႈၼမ်ႉတွင်ၸိင် ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။ လွင်ႈလုသုမ်းတင်းသွင်ၾၢႆႇပႆႇလႆႈ ႁူႉၸွမ်း။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ လၢတ်ႈဝႃႈ- သိုၵ်းမၢၼ်ႈဢမ်ႇမီးသၸ်ႉၸႃႇၼိူဝ်လွင်ႈငမ်း ယဵၼ်၊ ပေႃးၶဝ်သိုပ်ႇတိုၵ်းယိုဝ်းၸၢဝ်းၶိူဝ်းၵႂႃႇတိၵ်းတိၵ်းတႄႉ တိုၼ်းတေတုမ်ႉတိူဝ်ႉ လွင်ႈငမ်း ယဵၼ်ဢမ်ႇႁၢင်ႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈလၢတ်ႈဝႃႈ- ဝၼ်းထိ 18/02/13 (မိူဝ်ႈသိုၼ်း) လူတ်ႉၵႃးသိုၵ်းမၢၼ်ႈၸိူဝ်းလုၵ်ႉတၢင်း တၢင်ႇတီႈ လႄႈ လုၵ်ႉတၢင်းၵေးသီး လတ်းၽၢၼ်ႇမိူင်းသူႈၵႂႃႇတၢင်းမိူင်းဢွတ်ႇ မွၵ်ႈ 40 လမ်း ႁၢၼ်ႉတေႃႇမိူဝ်ႈလဵဝ်ပႆႇပွၵ်ႈ ၶိုၼ်း။ ၵူၺ်းၵႃႈ ၵႃးသိုၵ်းမၢၼ်ႈ 15 လမ်း ၸိူဝ်းလတ်းၽၢၼ်ႇတၢင်းမိူင်းၼွင် ၶိုၼ်ႈၵႂႃႇပွတ်းၼႃႈလိၼ် SSPP/SSA ၵုမ်းၵမ်တႄႉ မိူဝ်ႈဝႃးၵၢင်ဝၼ်း တၢင်ႇၵူၼ်းပွၵ်ႈၶိုၼ်း 13 လမ်း၊ ပဵၼ်ၵၢၼ် ပုတ်ႈလၢႆႈၶၢႆႉတီႈယူႇၵၼ်ၵူၺ်း- ဝႃႈၼႆ။

ၸဝ်ႈၵႃးလႃႈသဵဝ်ႈၵေႃႉၼိုင်ႈလၢတ်ႈဝႃႈ- ႁၼ်လူတ်ႉၵႃးသိုၵ်းမၢၼ်ႈ တၢင်ႇသိုၵ်းလုၵ်ႉတၢင်းၼွင်ၶဵဝ်ၶိုၼ်ႈၵႂႃႇပွတ်းလႃႈသဵဝ်ႈ မွၵ်ႈ 70 လမ်းပၢႆ။ ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်ၸၢႆးလႃႉ ၽူႈၶၢၼ်ပၢၵ်ႇ SSPP/SSA လၢတ်ႈဝႃႈ ၵႂႃႇတၢင်းၼႃႈလိၼ်ၵူဝ်းၵၢင်ႉ မွၵ်ႈ 20 လမ်းပၢႆ၊ လူင်းၵႂႃႇတၢင်းၶၢႆးသိမ်ႇမွၵ်ႈ 50 လမ်းပၢႆ၊ ၵူၺ်းၵႃႈ ဢၼ်ၶဝ်ႈ ၵိုတ်းလိုဝ်ႈၼႂ်းပွၵ်ႉယွမ်ႇတီႈၶၢႆးသိမ်ႇ မီး 8 လမ်းၵူၺ်း၊ လိူဝ်သေၼၼ်ႉ လဵပ်ႈၵႂႃႇတၢင်းၼွၵ်ႈၶၢႆးသိမ်ႇ- ဝႃႈၼႆ။

ၵဵဝ်ႇၵပ်းလွင်ႈပၢင်တိုၵ်းၼႆႉ ၵူၼ်းၼႂ်းပိုၼ်ႉတီႈဝႃႈ မိူဝ်ႈဝႃးဝၼ်းထိ 19/02/13 ဝၢႆးဝၼ်း 3 မူင်းတေႃႇထိုင် 5 မူင်းၵေႃႈ သိုၵ်းမၢၼ်ႈတင်းသိုၵ်းတႆးယိုဝ်းၵၼ်တီႈ 6 လၵ်း၊ ၾၢႆႇဢွၵ်ႇမိူင်းၵၢဝ် 6 လၵ်း။ ၵပ်းၵၢႆႇလွင်ႈၼႆႉ ၸဝ်ႈႁၢၼ်ၸၢႆးလႃႉလၢတ်ႈဝႃႈ ဢမ်ႇၸႂ်ႈပဵၼ်ပၢင်တိုၵ်းၵၼ်၊ သိုၵ်းမၢၼ်ႈပူၼ်ႉၶဝ်ႈၼႃႈလိၼ်ႁဝ်းမႃးလႄႈ မႃးၽႃႇၺႃးမၢၵ်ႇႁဝ်းႁၢင်ႈၵၢင်ဝႆႉၵူၺ်း။ သိုၵ်းမၢၼ်ႈ လႅပ်ႈၽႃႇမၢၵ်ႇႁဝ်းသေတပ်ႉတႅၵ်ႇၵႂႃႇၵေႃႉႁူႈၵေႃႉတၢင်း၊ ၵွပ်ႈၼၼ် ၶဝ်ႁၼ်တူၼ်ႈမႆႉတူင်ႉတီႈလႂ်ၵေႃႈယိုဝ်းသႂ်ႇတိၵ်းတိၵ်း ၵူၺ်း -ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်း SSPP/SSA လႆႈတိတ်းတေႃႇတၢင်းၾူၼ်ႊတွင်ႈထၢမ် တီႈတိူင်းသိုၵ်း ၸဵင်ႇႁွင်ႇ ဝၼ်းဢွၵ်ႇ (လႃႈသဵဝ်ႈ) ၶမယ ။ ၵူၺ်းၵႃႈ တိူင်းသိုၵ်းလႃႈသဵဝ်ႈတွပ်ႇဝႃႈ ဢၼ်တူင်ႉၼိုင်ပွတ်းတွၼ်ႈၼၼ်ႉ ဢမ်ႇၸႂ်ႈ တပ်ႉပႃႈတႂ်ႈ ၶမယ ၊ ပဵၼ်တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ယလၶ- ဝႃႈၼႆ။ (ပွတ်းတွၼ်ႈၼႆႉ ယလၶ ၵေႃႈဝႃႈပဵၼ် ၼႃႈလိၼ်ၵုမ်းၵမ်တိူင်းသိုၵ်း ၶမယ ။ တပ်ႉၶလယ 33 ၵေႃႈ ပဵၼ်တပ်ႉပႃႈတႂ်ႈ ၶမယ)။

ပူၼ်ႉမႃးမိူဝ်ႈဝၼ်းထိ 09/02/13 ၼၼ်ႉ သိုၵ်းမၢၼ်ႈတပ်ႉၶလယ 33 (မိူင်းၵၢဝ်) ယွၼ်းၵႂႃႇတူင်ႉၼိုင်ပွတ်းလွႆလၢၼ်း-ၼမ်ႉလဝ်း ၼႃႈလိၼ်သိုၵ်းတႆး SSPP/SSA ၽွင်းငမ်းၵုမ်းၵမ်၊ ၵူၺ်းၵႃႈဢမ်ႇလႆႈႁပ်ႉဢၼုၺၢတ်ႈ၊ သိုၵ်းမၢၼ်ႈ သမ်ႉပူၼ်ႉ ပႅၼ်ၶဝ်ႈၵႂႃႇသေၵႂႃႇယဵပ်ႇၺႃး မၢၵ်ႇဢၼ်သိုၵ်းတႆးႁၢင်ႈၵၢင်ဝႆႉ။ လွင်ႈၼႆႉ  ၵူၼ်းဝၢၼ်ႈဝႃႈ လႅပ်ႈပဵၼ်မၢၵ်ႇတႅၵ်ႇၶိူဝ်း၊ သိုၵ်းမၢၼ်ႈတၢႆဢမ်ႇယွမ်းမွၵ်ႈ 4 ၵေႃႉ၊ သိုၵ်းမၢၼ်ႈဢမ်ႇႁၢၼ်ႉၸႂ်လွင်ႈၼႆႉသေ ပွတ်းတွၼ်ႈၼၼ်ႉ မီးလွင်ႈၶဵင်ႈၶႅင်ၵၢၼ် သိုၵ်းတေႃႇၵၼ်ဝႆႉ။ ဢၼ်သိုၵ်းမၢၼ်ႈထႅမ်ႁႅင်းသိုၵ်းပွၵ်ႈၼႆႉ ၸၢင်ႈၵႂႃႇ တွပ်ႇတႅၼ်း ၶိုၼ်း SSPP/SSA ၵေႃႈပဵၼ်လႆႈ-ဝႃႈၼႆ။
Sourcehttp://www.panglong.org