ၸၢဝ်းၶိူဝ်းဢမ်ႇလႆႈသင် ဢၼ်ဢူးဢွင်ႇမိၼ်းပၼ်ၸၢဝ်းၶိူဝ်း

ၸၢဝ်းၶိူဝ်းဢမ်ႇလႆႈသင် ဢၼ်ဢူးဢွင်ႇမိၼ်းပၼ်ၸၢဝ်းၶိူဝ်း Tuesday, 05 February 2013 18:00 ပၢင်လူင် E-mail Print ဢၼ်ဢူးဢွင်ႇမိၼ်း ၵႅမ်ႁူဝ်ပဝ်ႈၸုမ်းၶပ်းၶိုင်လွင်ႈငမ်းယဵၼ် ဢုပ်ႇၵုမ်တင်းၸုမ်းၸၢဝ်းၶိူဝ်းသေ ၸၢဝ်းၶိူဝ်းယွၼ်းသင်ၵေႃႈ တူၵ်းလူင်းပၼ်မႃးၼၼ်ႉ တေႃႇထိုင်မိူဝ်ႈလဵဝ် ၸၢဝ်းၶိူဝ်း ဢမ်ႇလႆႈသင်။ ဢုပ်ႇၶၢင်ၵမ်းၼႆႉၵေႃႈ ဢူးဢွင်ႇမိၼ်း ၶပ်းၶိုင်ႁၢင်ႈႁႅၼ်းမႃးတႃႇပၼ်ၼင်ႇၵဝ်ႇ။ KIA n gov ပၢင်ႁူပ်ႉဢုပ်ႇၵုမ်လွင်ႈငမ်းယဵၼ် မၢၼ်ႈတင်းၶၢင် ၼႂ်းမိူင်းၶႄႇ Photo: Jade Land ဝၢႆးမၢၼ်ႈတင်းၶၢင် ႁူပ်ႉဢုပ်ႇၵုမ်ၵၼ်ၼႂ်းမိူင်းၶႄႇ ဝၼ်းထိ 04/02/13 (မိူဝ်ႈဝႃး)ယဝ်ႉ ၸွမ်းၼင်ႇၶၢဝ်ႇ VOA ဝၼ်းထိ 05/02/13 (မိူဝ်ႈၼႆႉပွတ်းၼႂ်)ဢွၵ်ႇၵႂႃႇၼၼ်ႉ ဢူးဢွင်ႇမိၼ်း ၵႅမ်ႁူဝ်ပဝ်ႈ(မၢႆ 2) ၶွမ်ႊမတီႊၶိုင်ပွင် လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC) လၢတ်ႈဝႃႈ - ဢၼ်ၵဝ်ၶႃႈဢုပ်ႇဢူဝ်းၸၢဝ်းၶိူဝ်းမႃးၼႆႉ ဢမ်ႇၸႂ်ႈတႃႇဢဝ်၊ ပဵၼ်တႃႇပၼ်ၵူၺ်း၊ ၸၢဝ်းၶိူဝ်းယွၼ်းဢီႈသင်ၵေႃႈ ၼင်ႇႁိုဝ်တေပၼ်လႆႈၼႆႉ ၶတ်းၸႂ်ႁႂ်ႈ ပၼ်လႆႈတီႈသုတ်း။ ဢၼ်မႃးပၢင်ဢုပ်ႇဢူဝ်းၵမ်းၼႆႉၵေႃႈ တႃႇမႃးယွၼ်းဢမ်ႇၸႂ်ႈ၊ တႃႇမႃးပၼ်ၵူၺ်းၼင်ႇၵဝ်ႇ။ ၵွပ်ႈၼၼ် ၽူႈၼမ်းၸၢဝ်းၶိူဝ်းၵမ်ႈၽွင်ႈယင်းယၢမ်ႈလၢတ်ႈဝႃႈ ဢၼ်ႁဝ်းၶႃႈတႄႉယွၼ်းမႃးၼမ်ယဝ်ႉ၊ ၵူၺ်းၵႃႈ ယူႇတီႈၾၢႆႇဢူးဢွင်ႇမိၼ်း သမ်ႉတေယွၼ်းသင်တီႈၸၢဝ်းၶိူဝ်းႁဝ်း၊ ယင်းဝႃႈၼႆလူးၵွၼ်ႇ- ဝႃႈၼႆ။ ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်း ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၸဝ်ႈၼိုင်ႈ လၢတ်ႈဝႃႈ- ဢၼ်ဢူးဢွင်ႇမိၼ်းပၼ်တႄႉၸႂ်ႈယဝ်ႉ၊ ၵမ်ႈၽွင်ႈဝႃႈ တင်ႈတႄႇဢုပ်ႇဢူဝ်းၵၼ်မႃးၶၢဝ်းတၢင်းၼိုင်ႈပီၼႆႉ ၸုမ်းၵိုတ်းသိုၵ်း ၸၢဝ်းၶိူဝ်းဢမ်ႇလႆႈသင်၊ မိူၼ်ၼင်ႇတူၵ်းလူင်းပၼ် RCSS/SSA ဝႃႈတေပၼ် မိူင်းတေႃႉ မိူင်းထႃး ႁူဝ်မိူင်း၊ ႁၢၼ်ႉတေႃႇထိုင် မိူဝ်ႈလဵဝ်ၵေႃႈယင်းဢမ်ႇလႆႈ။ တူၵ်းလူင်းၵၼ် ပိူဝ်ႈတႃႇ ႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ်ၵေႃႈ ႁၢၼ်ႉတေႃႇမိူဝ်ႈလဵဝ် ဢမ်ႇၸၢင်ႈသၢၼ်မိုဝ်းၵၼ်ႁဵတ်းၵၢၼ်ဢွၵ်ႇၼမ်ႉ ဢွၵ်ႇတူဝ်ၼႄသင်လႆႈ- ဝႃႈၼႆ။ ဝၼ်းထိ 04/02/13 (မိူဝ်ႈဝႃး) မၢၼ်ႈတင်းၶၢင် ႁူပ်ႉဢုပ်ႇၵၼ်ၼႂ်းမိူင်းၶႄႇ တီႈမိူင်းမၢဝ်း။ ပွတ်းၼႂ်ႁူပ်ႉဢုပ်ႇၵၼ် လွတ်ႈလွတ်ႈ လႅဝ်းလႅဝ်း ဢမ်ႇပဵၼ်တၢင်းၵၢၼ်။ တႄႇဝၢႆးဝၼ်း 14:00 မူင်းၵႂႃႇ ႁူပ်ႉဢုပ်ႇၵၼ်ၸၼ်ႉႁူဝ်တီး၊ လႆႈၸႂ်တူၵ်းလူင်းၵၼ်ဝႃႈ ၼင်ႇႁိုဝ်ပေႃးတေၵေႃႇသၢင်ႈလႆႈလွင်ႈငမ်းယဵၼ်၊ တေဢမ်ႇပဵၼ်သိုၵ်းသိူဝ်ၵၼ်ထႅင်ႈၼၼ်ႉ သွင်ၾၢႆႇတေႁူပ်ႉထူပ်းဢုပ်ႇဢူဝ်း ၵၼ်ၵႂႃႇထႅင်ႈ- ၼႆယဝ်ႉ။ ပၢင်ႁူပ်ႉဢုပ်ႇၵုမ်ၵၼ်ပွၵ်ႈၵမ်းၼႆႉ ၼွၵ်ႈၼိူဝ်သေမၢၼ်ႈတင်းၶၢင်ယဝ်ႉ ယင်းမီးၸုမ်းၸၢဝ်းၶိူဝ်းၵႂႃႇၶဝ်ႈႁူမ်ႈ ၸွမ်းထႅင်ႈ။ ၾၢႆႇၸဝ်ႈၼႃႈတီႈၶၢင်မီး ၽူႈၶဝ်ႈၵေႃငဝ်ႈငုၼ်း KIA ဢူးသမ်ႇလုၵ်ႉၵမ်ႇ၊ ၵႅမ်ၽူႈပွင်ၵၢၼ်သိုၵ်း KIA ၸွမ်ႁၢၼ်ၵုၼ်ႇမေႃႇ။ ၾၢႆႇမၢၼ်ႈ ဢူးဢွင်ႇမိၼ်းဢွၼ်ႁူဝ် ပႃးၸဵမ်ၽွင်းလူင် ႁွင်ႈၵၢၼ်ၾၢႆႇလဵင်ႉလူသတ်းလႄႈ ၾၢႆႇပွင်ၵၢၼ်ၼမ်ႉ ဢူးဢူင်းမျိၼ်ႉ၊ တင်းဢၼ်လုၵ်ႉမႃးတီႈ သုၼ်ၵၢင်ငမ်းယဵၼ်မၢၼ်ႈ (Myanmar Peace Center) ဢူးလႃႉမွင်ႇသူၺ်ႇ၊ ၻွၵ်းတိူဝ်ႊၵျေႃႇ ယိၼ်ႇလၢႆႇ ၶဝ်ၸိူဝ်းၼႆႉ ႁူမ်ႈတင်းမူတ်းမႃး 8 ၵေႃႉ။ ၾၢႆႇတႆး (RCSS/SSA) ၵႅမ်ၸွမ်ႁၢၼ်ၸၢႆးလူး၊ ႁူဝ်ပဝ်ႈႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ၸွမ်သိုၵ်းလူင် မူႇတူးသေးၽူဝ်း၊ ၽူႈၼမ်းၼႂ်း KNU ပတူဝ်ႇၸေႃးၵွႆႇထူးဝိၼ်း၊ ၸဝ်ႈႁၢၼ် ယွင်ႁူၺ်ႈ၊ ပီႊတိူဝ်ႊပႅၵ်ႉလႅင်ႇ။ ၼွၵ်ႈသေၼၼ်ႉ ၸုမ်းသိုဝ်ႇၶၢဝ်ႇ VOA လၢတ်ႈဝႃႈ ၽွင်းတၢင်ၶႄႇၵဵဝ်ႇၵပ်းမိူင်းမၢၼ်ႈၵေႃႈၶဝ်ႈႁူမ်ႈၸွမ်း- ၼႆယဝ်ႉ။ ၸွမ်ႁၢၼ်ၵုၼ်ႇမေႃႇလၢတ်ႈတီႈၸုမ်းသိုဝ်ႇ VOA ဝႃႈ-ပၢင်ႁူပ်ႉဢုပ်ႇၵုမ်ၵၼ်ပွၵ်ႈၼႆႉ ႁဝ်းၶႃႈဢုပ်ႇဢူဝ်းလွင်ႈၵေႃႇသၢင်ႈလွင်ႈ ယုမ်ႇယမ်ၵၼ်၊ ပၢင်တိုၵ်းဢၼ်ပဵၼ်ယူႇတီႈမိူင်းၶၢင်ႁဝ်းၶႃႈၼႆႉ တေႁဵတ်းႁိုဝ်ႁႃလၢႆး မၼ်းႁႂ်ႈပေႃးၵိုတ်းလႆႈ။ ၼင်ႇႁိုဝ်တေ ထိုင်ၸၼ်ႉလူတ်းယွၼ်ႇလႆႈလွင်ႈတိုၵ်းတေႃးၵၼ်သေ ဢမ်ႇပဵၼ်ပၢင်တိုၵ်း သိုၵ်းသိူဝ်ၵၼ်ထႅင်ႈၼၼ်ႉ ႁဝ်းၶႃႈတေသိုပ်ႇဢုပ်ႇ ဢူဝ်းၵၼ်ၵႂႃႇထႅင်ႈ ႁႂ်ႈပေႃးပၼ်ၵႂၢမ်းမၼ်ႈၵၼ်ၵႂႃႇလႆႈ- ဝႃႈၼႆ။ ပၢင်ၵုမ်ပွၵ်ႈၵမ်းၼႆႉ ၸုမ်းၶၢင် KIA/KIO ဢွၵ်ႇၶေႃႈပိုၼ်ၽၢဝ်ႇ (Statement) ၊ ၵူၼ်းၶဝ်ႈႁူမ်ႈပၢင်ၵုမ်ၵေႃႉၼိုင်ႈ လၢတ်ႈဝႃႈ- ၼႂ်းၶေႃႈပိုၼ်ၽၢဝ်ႇၼၼ်ႉ ၵွပ်ႈဢမ်ႇပႃးၾၢႆႇၸွႆႈထႅမ်ပိူင်ၵူၼ်း (Humanitarian assistance) တင်းၾၢႆႇၼႄႉၼမ်းၵၢၼ် ၵိုတ်းယိုဝ်း (Ceasefire monitoring) လႄႈ ၵူၼ်းၵႂႃႇၶဝ်ႈပၢင်ၵုမ်ၵမ်ႈၽွင်ႈ ဢမ်ႇႁၢၼ်ႉၸႂ်- ၼႆယူႇ။

SourceHttp://panglong.org