ၼႂ်းတႃႈၵုင်ႈ တင်း မိူင်းတႆးလၢႆတီႈ တေၸတ်းဝၼ်းၸိူဝ်ႉၸၢတ်ႈၸိုင်ႈတႆး

ၼႂ်းတႃႈၵုင်ႈ တင်း မိူင်းတႆးလၢႆတီႈ တေၸတ်းဝၼ်းၸိူဝ်ႉၸၢတ်ႈၸိုင်ႈတႆး Monday, 04 February 2013 13:25 ပၢင်လူင် E-mail Print ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 66 ပီ 2013 ၼႆႉ ပီႈၼွင်ႉတႆးတူၼ်ႈတီး-တႃႈၵုင်ႈ ႁူမ်ႈၵၼ်ၸတ်းတီႈ တႃႈၵုင်ႈ။ ၼွၵ်ႈသေၼၼ်ႉ ၼႂ်းၸိုင်ႈတႆးလၢႆလၢႆၸႄႈဝဵင်း ၵေႃႈ ႁူမ်ႈၵၼ်ၸတ်း၊ မၢင်ၸႄႈဝဵင်းတိုၵ်ႉၸတ်းပွၵ်ႈႁႅၵ်ႈ သုတ်း။ panglong-co-ag ႁုၼ်ႇႁၢင်ႈ ၵၢၼ်လူင်းလၢႆးမိုဝ်းၶေႃႈၵိၼ်ၵႅၼ်ႇ လိၵ်ႈႁူမ်ႈမၢႆပၢင်လူင် မိူဝ်ႈပီ 1947 ဝၼ်းထိ 07/02/13 ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 66 ပီတဵမ်ၼႆႉ ၵေႃလိၵ်ႈလၢႆးလႄႈၾိင်ႈငႄႈတႆး (တႃႈၵုင်ႈ) တင်း မူႇၸုမ်းတႆးတူၼ်ႈတီး တေႁူမ်ႈၵၼ်ၸတ်းတီႈ ႁူင်းၵႃႈၸၢတ်ႈၸၢဝ်းၶိူဝ်း (ဢမဵဝ်းတႃး ၵႃႉၸၢတ်ႉယူင်ႇ) ဝဵင်းတႃႈၵုင်ႈ။ တင်ႈတႄႇ ယၢမ်း 13:00 မူင်း (ဝၢႆးဝၼ်း) ၵႂႃႇ တႄႇပိုတ်ႇႁွင်ႈၼႄပိုၼ်း ၵဵဝ်ႇၵပ်းမိူင်းတႆး၊ တေၵႅတ်းမႆလၢႆႈပိုတ်ႇပၢင်ၵႅဝ်ႈ၊ ပွႆႇမၢၵ်ႇပွင်းလူမ်း ၶိုၼ်ႈၾႃႉ။ ၼႂ်းပၢင်ပွႆး တေမီးပႃး ႁၢၼ်ႉၶၢႆတၢင်းၵိၼ်တႆး- ၼႆယဝ်ႉ။ တင်ႈတႄႇယၢမ်း 18:00 မူင်း (ႁူဝ်ၶမ်ႈ)ၵႂႃႇတေမီးပၢင်မူၼ်ႈသိူဝ်း။ ဢွၼ်တၢင်းသုတ်း တေပိုတ်ႇၽဵင်းၵႂၢမ်းတၢင်ႇတုင်းၸိူဝ်ႉ ၸၢတ်ႈ (ၶိူဝ်းတႆးၶိူဝ်းရႃၸႃ) သေ ၽူႈဢွၼ်ႁူဝ်ႁွင်ႉ တေပဵၼ်ၽူႈႁွင်ႉၵႂၢမ်းၸၢႆးလဵၵ်ႉ တင်းၼၢင်းသရႃႇလႄႈမီးၵူၼ်းၼုမ်ႇ ၸိူဝ်းၶဝ်ႈႁူမ်ႈပၢင်ပွႆးမူၼ်ႈၸႂ်ပၼ်လႄႈ တၢင်းၵႃႈတၢင်းဝႅၼ်၊ ႁွင်ႉၽဵင်းၵႂၢမ်း ၸၢဝ်းၶိူဝ်း ပဢူဝ်း တဢၢင်း၊ လႃးႁူႇ၊ ထၼု၊ ဢင်းသႃး၊ ၸုမ်းၵျွၵ်ႉမႄး၊ သီႇပေႃႉ၊ မိူင်းၵုတ်ႈ၊ ထုင်ႉမၢဝ်း၊ ၵဵင်းတုင်၊ ၵေႃလိၵ်ႈလၢႆးၾိင်ႈငႄႈ တႃႈၵုင်ႈ တင်း ၸုမ်းတူၼ်ႈတီး ၸိူဝ်းၼႆႉ။ ပၢင်ပွႆးၶုၵ်းထူပ်း ဝၼ်းၸိူဝ်ႉၸၢတ်ႈၸိုင်ႈတႆး တီႈတႃႈၵုင်ႈၼႆႉ ၵူႈပီပူၼ်ႉမႃးၵေႃႈ ၸုမ်းတူၼ်ႈတီး တင်း ၵေႃလိၵ်ႈလၢႆးဢွၼ်ႁူဝ် ႁဵတ်းသၢင်ႈမႃး။ ပီၼႆႉ ငိုၼ်းၵမ်ႉၸွႆႈၵေႃႈလႆႈၼမ်လႄႈ တေၸတ်းတီႈ ႁူင်းၵႃႈၸၢတ်ႈၸၢဝ်းၶိူဝ်း။ မီးၶွမ်ႊပၼီႊ TV sky net မႃးထၢႆႇဢွၵ်ႇႁၢင်ႈသဵင်ၵမ်းသိုဝ်ႈ ၸွႆႈပိုၼ်ပွႆႇပၼ်လၢႆလၢႆ လူၺ်ႈဢမ်ႇ လႆႈသဵင်ႈၵႃႈသဵင်ႈႁူဝ်။ ပိူဝ်ႈတႃႇပွင်ပဵၼ်ပၢင်ပွႆးၼႆႉ ပီၼႆႉလႆႈငိုၼ်းၵမ်ႉၸွႆႈတင်းမူတ်း 150 သႅၼ်။ ႁႅင်းငိုၼ်းၼႆႉ ယေးငိုၼ်းၵမ်ႇပေႃးၸ ႁွမ်းတၢၼ်း ၸွႆႈထႅမ်ပၼ် 5,000,000 ပျႃး (သႅၼ် 50)၊ ၶွမ်ႊပၼီႊၵၢၼ်ၵေႃႇသၢင်ႈ (သူၺ်ႇတွင်ႇ) 5,000,000 ပျႃး၊ ပႃႇတီႇႁူဝ်သိူဝ် 500,000 ပျႃး။ ၼွၵ်ႈသေၼၼ်ႉ မီးႁူင်းယႃၸၢင်ႉႁူၵ်းတူဝ် ဢိၵ်ႇၵူၼ်းၵႃႉလူင် ၸဝ်ႈၵၢၼ်မၢၵ်ႈမီးၶဝ် ၵမ်ႉၸွႆႈထႅင်ႈ။ (ႁူင်းယႃ ၸၢင်ႉႁူၵ်းတူဝ်ၼႆႉ ၵႃႈပူၼ်ႉမႃး ပေႃးတႆးမီးပွႆးၵိၼ်ပွႆးတၢၼ်း ၵႆႉၵမ်ႉၸွႆႈငိုၼ်းမႃးတႃႇသေႇ)။ ပိူဝ်ႈတႃႇၶဝ်ႈတူၺ်းပၢင်ပွႆး မီးဝႂ်ၶဝ်ႈတူၺ်း 3 သႅၼ်း၊ ၵႃႈၶၼ် 2,000- 3,000-5,000 ပျႃး။ မိူဝ်ႈလဵဝ် ယင်းပႆႇထိုင်ဝၼ်းပၢင်ပွႆး ဝႂ်မၼ်းပေႃးၸမ်မူတ်းယဝ်ႉ။ ပၢင်ပွႆးၼႆႉ မိူဝ်ႈၵူႈပွၵ်ႈ ပၢၼ်လူင်ပွင်ၸိုင်ႈသိုၵ်းၼၼ်ႉ ဢမ်ႇပၼ်သႂ်ႇၸိုဝ်ႈဝႃႈ ပၢင်ပွႆးဝၼ်းၸိူဝ်ႉ ၸၢတ်ႈၸိုင်ႈတႆး၊ လႆႈသႂ်ႇၸိုဝ်ႈဝႃႈပၢင်ပွႆး ၼႄတၢင်းၵႃႈၸၢဝ်းၶိူဝ်း ၼႂ်းမိူင်းတႆး ၼႆၵူၺ်း၊ လိူဝ်ၼၼ်ႉသမ်ႉလႆႈၸတ်းတီႈ ၼႂ်းဝၢင်းဝတ်ႉ 9 လၵ်းၵူၺ်း၊ ဢမ်ႇပၼ်ၸတ်းတၢင်ႇတီႈ- ၵူၼ်းၼုမ်ႇၽူႈတူင်ႉၼိုင်ၼႂ်းၵေႃလိၵ်ႈလၢႆးၵေႃႉၼိုင်ႈလၢတ်ႈၼင်ႇၼႆ။ ပူၼ်ႉမႃးမိူဝ်ႈပီ 1995-96 လႆႈၸတ်းတၢင်းၼွၵ်ႈ တီႈႁူင်းၵႃႈၸၢတ်ႈပတုင်ႇမႃႇ (ပတုင်ႇမႃႇၵၸၢတ်ႉယူင်ႇ မီႇၼိၵူင်း)၊ ၵူၺ်းၵႃႈဝၢႆး 1995-96 မႃး လူင်ပွင်ၸိုင်ႈသိုၵ်းဢမ်ႇပၼ်ၸတ်းယဝ်ႉလႄႈ ၸုမ်းတူၼ်ႈတီး တင်း ၵေႃလိၵ်ႈလၢႆးလႆႈႁူမ်ႈၵၼ်မႃးၸတ်းတီႈ ဝတ်ႉ 9 လၵ်း တႃႈၵုင်ႈ။ ပီ (2013) ၼႆႉ ၼႂ်းၸိုင်ႈတႆးလၢႆလၢႆၸႄႈဝဵင်းၵေႃႈၸတ်း၊ မိူၼ်ၼင်ႇ တီႈတူၼ်ႈတီး၊ မိူင်းၼၢႆး၊ လၢႆးၶႃႈ၊ ၼမ်ႉၸၢင်ႈ၊ ပုင်ႇပႃႇၶႅမ်၊ မိူင်းၽျၢၵ်ႈ၊ ၼမ်ႉၶမ်း ၸိူဝ်းၼႆႉ။ တီႈမိူင်းၼၢႆး ပီၼႆႉပဵၼ်ၵၢၼ်ၸတ်း ပွၵ်ႈႁႅၵ်ႈသုတ်း ၼႂ်းႁွပ်ႈ 20 လႄႈတေၸတ်းၶိုၵ်ႉယႂ်ႇဝႆႉ- ၼႆယဝ်ႉ။ 

SourseHttp://panglong.org